FİFA “Kastilyo işi” ilə bağlı təhqiqatı başa vurub.

Ali futbol qurumu Çili Futbol Federasiyasının (ÇFF) müraciətini rədd edib.

Bir neçə həftə əvvəl Çili yığmasının vəkili Eduardo Karlezzo Ekvador millisinin müdafiəçisi Bayron Kastilyonun kolumbiyalı olması ilə bağlı sübutların olduğunu, buna görə də onun Ekvador yığmasında oynamaq hüququnun olmadığını bəyan etmişdi. Vəkil Kastilyonun doğum haqqında şəhadətnaməsinə əsasən onun 1998-ci il noyabrın 10-da Ekvadorda deyil, Kolumbiyanın Tumako şəhərində anadan olduğunu iddia etmişdi. Bu faktla bağlı materialları mayın 5-də FİFA-ya təqdim edən ÇFF Ekvador yığmasının DÇ-2022-nin seçmə turnirində Bayronun xidmətindən istifadə etdiyi 8 oyununun nəticəsinin ləğvini və bu komandaların rəqiblərinə texniki qələbə verilməsini istəmişdi. Bu halda Ekvador bu il Qətərdə keçiriləcək dünya çempionatında iştirak hüququnu itirəcək və bu imkanı məhz Çili yığması qazanacaqdı.

Lakin “Kastilyo işi”ni bağlayan FİFA ÇFF-nin müraciətini əsassız hesab edib. Ali futbol təşkilatının cümə günü yaydığı məlumatda maraqlı tərəflərin 10 gün ərzində FİFA-nın Apellyasiya Komitəsinə müraciət etmək hüququnun olduğu qeyd edilir.