Aslan Kərimovu bu komanda təəccübləndirib - AÇIQLAMA
Misli premyer-liqasında ilk dövrəyə yekun vuruldu.
9 turdan sonra 1 oyun az keçirən "Qarabağ" maksimum nəticə ilə vahid liderdi. "Şamaxı" isə turnir cədvəlinin dibində yer alıb.
Birinci dövrədə komandaların nəticələrini dəyərləndirməsi üçün Aslan Kərimova müraciət etdik. Təcrübəli mütəxəssis “Football-plus.az” saytına bunları söylədi:
"Əslində, təxmin etdiyim nəticələr gördüm. "Qarabağ"ın lider olacağı heç kimdə şübhə doğurmurdu. Qurban Qurbanovun yetirmələri bütün komponentlərdə rəqiblərini üstələyir. 2-3-cü yerlər uğrunda mübarizə mübahisəliydi. Amma "Sabah"ın sərgilədiyi oyun və nəticələri göstərdi ki, "Neftçi"ni üstələyir. Masazır təmsilçisi çempionluğa oynadığını, minimum ilk "3-lük"də yer alacağını göstərir. "Neftçi" hələ də oyun planında tam istədiyini həyata keçirə bilmir. "Zirə" çempionata yaxşı başlamasa da, əzmkarlığı ilə özünə gəlməkdi. “Sükanı arxasında” Rəşad Sadıqovun yer alması komandanın sona qədər döyüşəcəyindən xəbər verir. Odu ki, "Neftçi" ilə "Zirə"nin ilk "3-lük" uğrunda mübarizə aparacağı şübhəsizdi. "Qəbələ" ötən mövsüm gözəl oyunu və avrokuboka vəsiqə qazanması ilə təəccübləndirdi. Hazırda Elmar Baxşəliyevin komandası bacardıqca sabit çıxış edir. "Qırmızı-qaralar"ı geri atan büdcənin zəif, heyətin kasad olmasıdı. Gəlin, açıq danışaq, bir komandanın zəfərlər qazanıb, yüksək yerlər tutması üçün yalnız baş məşqçi və döyüşkən kollektivin olması yetərli deyil. Maliyyə gücünün olması mütləqdi. Yeni qurulan "Turan Tovuz"un mübarizliyi ilə turnir cədvəlinin ortalarında yer alacağını heç kim gözləmirdi. Xüsusən də ötən mövsümlə müqayisədə bu il daha güclü "Səbail"in olduğu halda. "Dənizçilər", heyətində güclü, təcrübəli futbolçular yer almasına rəğmən, hələlik sabit oyun nümayiş etdirə bilmir. Məni ən çox təəccübləndirən komanda "Sumqayıt" oldu. Hələ ötən mövsümdə Aleksey Baqadan çox şey gözləməyən rəhbərlik bu il ondan dinamik futbol və daha yuxarı yerlər uğrunda mübarizə umurdu. Hətta klubun strategiyası da dəyişdi. Komandaya legioner futbolçular cəlb olundu. Amma inkişaf gözə dəymədi. Baqa yola salındı, yerinə Samir Abasov gəldi. Samir müəllim hazırda komandanı toparlamaqla məşğuldu. İnanıram ki, döyüşkən "Sumqayıt" yaradacaq. Hazırda ondan çox şey tələb etmək də doğru deyil. Çünki komandaya xeyli legioner cəlb olundu. Bu da məşqçinin işini bir qədər çətinləşdirir. Düşünürəm ki, "Sumqayıt"da əvvəlki kimi sırf yerli və “milliləşdirilən” futbolçular yer alsaydı, Samir müəllim onlarla rahat dil tapardı, komandanı daha tez toparlayardı. "Şamaxı"ya gəlincə, klubun strategiyası yeniləndi, ancaq yerli və gənclərlə davam etməyi qərara aldılar. Bu da komandanın sonuncu olmamaq üçün mübarizə aparacağı deməkdi. "Şamaxı" yenidən formalaşdırılan kollektiv olsa da, meydanda yaxşı döyüşür. "Kəpəz"ə gəlincə, komanda çempionata istədiyi kimi hazırlaşa bilməmişdi. Ardıcıl məğlubiyyətlər baş məşqçi dəyişikliyi ilə nəticələndi. İstənilən klub mövsümün gedişində məşqçi dəyişikliyinə gedirsə, bu, komandanın oyun planına təsir edir. Yeni məşqçinin tələblərinə, taktiki-texniki prinsiplərinə uyğunlaşmaq üçün vaxta ehtiyac olur. Gəncə təmsilçisində də hazırda həmin vəziyyətdi. Düzdü, Tərlan Əhmədovun gəlişiylə komandada ab-hava bir az yaxşılaşıb, qələbə və heç-heçələr də olub. Bunları kiçik olsa da, müsbət dəyişiklik saymaq olar. Amma görüləcək çox iş var. İnanıram ki, Tərlan müəllim istədiyi komandanı formalaşdıracaq. Çempionat uzun marafondu. Qarşıda bizi çox maraqlı oyunlar, nəticələr gözləyir. Bütün komandalarımıza uğurlar arzu edirəm".
ABDULLA İSMAYILOĞLU
Digər xəbərlər
