"Ömərlə tək oğul-ata yox, həm də məşqçi-futbolçu, dost kimi münasibətimiz var"
Premyer-liqanın 18-ci turunun "Neftçi" - "Şamaxı" oyununun 90+2-ci dəqiqəsində gənc futbolçu Ömər Qurbanov Ataa Caberin əvəzinə meydana çıxmaqla bakılıların heyətində debütünü rəsmiləşdirdi.
Football-plus.az olaraq bununla bağlı 17 yaşlı oyunçudan açıqlama almaq istəsək də, cəhdimiz baş tutmadı. Belə olan təqdirdə "Neftçi"nin mətbuat katibi Rüstəm Allahverdiyevlə əlaqə saxladıq:
"Ömər cəmi 1 dəqiqə meydanda olub. İndidən gənc futbolçumuzun medianın gündəmində olmasında klub olaraq maraqlı deyilik. Ömər növbəti matçlarda da şans qazanıb oynasa, onda açıqlama almaq üçün şərait yaradacağıq".
Sənan Qurbanovdan da oğlunun debütü haqda açıqlama aldıq. Mütəxəssis məsələ ilə bağlı bunları söylədi:
"Ömərin "Neftçi"də debüt etməsi həm özünü, həm də məni çox sevindirdi. Amma hələ üzərində çox işləmələdi. Onun gələcək uğuru gərgin zəhmətdən, özünə tənqidi yanaşmadan keçir. Ömərlə tək oğul-ata yox, həm də məşqçi-futbolçu, dost kimi münasibətimiz var. Onunla tez-tez oturub məşqlərdəki çıxışı, oyunları ilə bağlı təhlillər aparırıq".
ABDULLA İSMAYILOĞLU
Digər xəbərlər
