“Kəpəz”dən ayırlandan sonra ondan səs-soraq yoxdu.

Heç mətbuatda da açıqlamalarına rast gəlməmişəm. Deyəsən, üç ildən bir qədər artıq Gəncədə çalışması onu yorduğundan “dağlara çəkilməyi”, gözdən-könüldən uzaq bir güşədə dincəlməyi lazım bilir. Yəqin söhbətin Yaşar Vahabzadədən getdiyini başa düşdüz.

Açığı, “sarı-göylər”in “sükanı arxasından” gedəndən sonra onunla danışmaq üçün bir-iki dəfə cəhd etdim. Ancaq hər dəfə bir bəhanə ilə söhbətdən yayındı. Bu dəfə də şablon sözlərlə müsahibə vermək istəmirdi. Güc-bəla danışmağa razı salsam da, bir şərti oldu: “Kəpəzl”ə bağlı suallara cavab verməyəcəm. Başqa nə maraqlıdısa, buyur, səni eşidirəm”.

- “Kəpəz”lə bağlı danışmaq istəmirsiz. Ancaq gəncəli azarkeşlər bu gün də sizi yada salır, sosial şəbəkələrdə sizinlə bağlı paylaşımlar edirlər.
- Nə yazırlar?

- Çox fikirlər var... Hansını deyim?
- Gəncəli futbolsevərlər bu gün də məni yada salırsa, deməli, hər şey yaxşıdı. Pis və ya yaxşı, nə fərqi var (gülür). Əsas odu, xatırlayırlar. Gəncədə həm yaxşı, həm də pis günlərimiz olub. Ancaq yaxşıların sayı daha çox olub.

- Komandanın oyunlarını izləyirsiz?
- Çempionat oyunlarına baxıram. “Kəpəz”in də o cümlədən.

- Sizin “Kəpəz”lə Tərlan Əhmədovun “Kəpəz”i arasında hansı fərq var?
- Şərtimiz oldu axı. “Kəpəz”lə bağlı sualları cavablamayacam. Hər şey göz qabağındadı. Ortada nəticə varsa, deməli, komanda oyununu tapıb.

- Son günlər komanda daxilində xoşagəlməz söz-söhbət yaşanır. Bir qrup təcrübəli, sizin vaxtınızda düşərgəyə cəlb olunan futbolçularla baş məşqçi arasında narazılıq var. Sizin də bu məsələyə münasibətinizi bilmək istərdim.
- “Sizin vaxtınızda düşərgəyə cəlb olunan futbolçularla” sözünü xüsusi eyhamla işlətdin. Nə demək istəyirsən, açıq danış? Sənin sözündən belə çıxır ki, Əfran, Elvin, Rauf mənim dönəmimdə komandaya dəvət olunub deyə, başverənlərə görə məsuliyyət daşıyıram? Belə düşünürsüzsə, səhviniz var. Niyə başqalarının adını çəkmirsiz? Abdullahi Şuaybunu, Əhməd Ayazayanı da mən dəvət etmişdim. Siz ancaq qaşınmayan yerdən qan çıxarmağa çalışırsız. Son günlər baş məşqçi ilə bəzi futbolçular arasında yaşananlarda kimin haqlı, kimin haqsız olduğunu zaman göstərəcək.

- “Kəpəz”dən danışmaq istəmirsiz. Onda çempionatla bağlı fikirlərinizi bölüşün. Artıq ilk yarı geridə qaldı. 18 turdan sonra sizi nə təəccübləndirdi, nə qanunauyğun oldu?
- “Qarabağ”ın fasiləyə ilk pillədə yollanması gözlənilən idi. Qurban Qurbanovun komandası hələ mövsümün əvvəlində, avrokubok oyunları zamanı artıq iddiasını ortaya qoymuşdu. Açığı, “Səbail” məni təəccübləndirdi. Mövsümlərarası fasilədə yeni baş məşqçi dəvət olundu, büdcə yetərincə artdı, komandaya yeni legionerlər cəlb edildi. Buna baxmayaraq, komanda hazırda sonuncu pillədədi. Əslində onlardan gözləntim çox idi. Ümid edirəm ki, üçüncü dövrədə Mahmud Qurbanovun komandası toparlanacaq. “Sumqayıt”dan da artığını gözləyirdim. Onlar da iki dövrədə ümidləri doğrultmadı. Məni yaxşı mənada təəccübləndirən “Şamaxı” oldu. Komandanın “onurğa sütunu”nu yerli gənclər təşkil etsə də, xüsusilə ikinci dövrədə yaxşı təsir bağışladılar. Fikrimcə, fasilədən sonra bizi daha gərgin, maraqlı mübarizə gözləyir.

- Ölkə kubokunda “Qarabağ”la “Sabah” mübarizəni dayandırdı. Yarımfinalçılar da bəllidi. Sizcə, kubokda yola davam edən “dördlük”dən kim daha şanslıdı?
- Həmişə deyirlər ki, kubok matçları tam fərqli olur. Özümüz də bunun şahidi olduq. Bəlkə də çoxları “Qarabağ”la “Sabah”ı əsas favoritlərdən biri kimi qəbul edirdi. Ancaq “Qəbələ” Ağdam klubunun, autsayder “Səbail” isə “Sabah”ın yarımfinala yolunu kəsdi. Şanslara gəlincə, “Qəbələ” çox təcrübəlidi. “Turan Tovuz”un ambisiyalı baş məşqçisi var. Məncə, Ayxan Abbasov bütün diqqətini kuboka yönəldəcək. “Səbail” fasilədə heyəti gücləndirə bilər. Bu gün mətbuatda oxudum ki, Mahmud Qurbanov 4 legionerlə vidalaşıb. Onları yola salıblarsa, deməli, əvəzinə daha güclülərini dəvət edəcəklər. Onlar da iddiasını ortaya qoyacaq. Ancaq mənə elə gəlir, yarımfinalçılar arasında “Neftçi” hamıdan bir addım öndədi. Bakılıların ölkə kubokunu qazanmaq şansını yüksək qiymətləndirirəm.

- “Neftçi”dən söz düşmüşkən, uzun illər şərəfini qoruduğunuz komandanın çempionluq mübarizəsində “Qarabağ”a uduzmasına necə baxırsız? Bu gün hətta “Sabah” belə “ağ-qaralar”ı qabaqlayır.
- Kim nə deyir-desin, necə istəyir, qəbul etsin, Azərbaycan futbolunun tarixi “Neftçi” ilə başlayıb. Bu gün “Qarabağ” sərgilədiyi oyun, qazandığı nəticələrlə bizi sevindirir, Avropada fəxrimizdi. Ancaq “Neftçi”nin Azərbaycan futbolunda yeri tam başqadı. Bunu o kluba gələn legioner futbolçuya, əcnəbi baş məşqçiyə də başa salmaq lazımdı. Onlar bilməlidi ki, ənənəsi, tarixi olan komandada oynayırlar və ya çalışırlar.

- Yığma barədə nə düşünürsüz? Artıq üç aydan sonra milli Canni de Byazinin rəhbərliyi altında yeni tsiklə start verəcək. Sizcə, italiyalı mütəxəssisi postunda saxlmamaq düzgün addım idi?
- Son oyunlar yığmanın inkişafda olduğunu göstərdi. Yeni, döyüşkən komanda formalaşıb. Ümid edirəm ki, bu seçmə mərhələdə milli daha yaxşı nəticələrlə bizi sevindirəcək. Canni de Byazi ilə müqavilənin müddətinin uzadılmasına gəlincə, bu mənim səlahiyyətimdə olan məsələ deyil. Onun qalması məsləhət bilinibsə, deməli, nəyəsə əsaslanıb bu qərarı veriblər. Ancaq son oyunlar göstərdi ki, komanda düz yoldadı, “relsə düşüb”.

RƏŞAD