Mövsümə uğursuz başlayan “Kəpəz” 4 turdan sonra turnir cədvəlinin sonunda qərarlaşıb.

Uğursuz startdan və hər matçdan sonra gəncəli azarkeşlərin “istefa” şüarından təngə gələn “sarı-göylər”in baş məşqçisi Yaşar Vahabzadə “Səbail”lə qarşılaşmadan sonra postundan ayrıldı. “Dənizçilər”lə görüşdə daha bir xoşagəlməz olay Rauf Əliyevlə meydan sahiblərinin baş məşqçisi Mahmud Qurbanov arasında yaşandı.

Tura damğa vuran insidentin və Gəncə təmsilçisinin uğursuz çıxışının nədən qaynaqlandığını öyrənmək üçün təcrübəli forvardla danışmağa qərar verdik. Əliyev bəzi suallara açıq cavab versə də, bir qisminin üstündən keçməyi lazım bildi.

- 4 turdan sonra sonuncu pillədə qərarlaşan “Kəpəz”in problemi nədi?
- Problem bir deyil, iki deyil. Hansını deyəsən?! Özünüz də bilirsiz ki, mövsümlərarası fasilədə ən gec toplanan, normal təlim-məşq toplanışı keçməyən məhz bizim komanda oldu. Yeni toplanmış komandanın mövsümə hazırlaşmaq üçün cəmi 10-15 gün vaxtı var idi. Yoxlama görüşlərinin də sayı az oldu. Bakıda qalan komanda sınaq matçları üçün rəqib tapa bilmirdi. Bunlar hamısı çempionat ərəfəsində yaşananlardı. Çempionat start götürəndən sonra ev oyunlarını Gəncədən kənarda keçirməyimiz də nəticələrə təsirini göstərir. Bir şəhərdə məşq edirsən, oyun üçün başqa yerə gedirsən. Demək olar ki, bütün vaxtın yollarda keçir. Damla-damla yığılan çatışmazlıqlar, problemlər sonda komandanın çıxışında əksini tapır.

- Təcrübəli futbolçu kimi heyətlə bağlı fikirlərini bilmək maraqlıdı. Bu futbolçularla nəyəsə ümid etmək olar?
- Bunu zaman göstərəcək. Deməzdim ki, heyətimiz çox zəifdi. Mübarizə aparmağı bacaran oyunçularımız var. Fərdi keyfiyyətləri yüksək olan futbolçular var ki, onlarla nəsə edə bilərik. Yenə qayıdıram o məsələyə ki, ev oyunlarını Gəncədən kənarda keçirməyimiz bizi daha çox sıxır, nəinki başqa səbəblər. Rəqiblərimizi Gəncədə qəbul etsəydik, bəlkə də turnir cədvəlinin sonunda qərarlaşmazdıq.

- Ardıcıl 4-cü məğlubiyyətdən sonra baş məşqçi Yaşar Vahabzadə istefa verdi. Onun postundan gedəcəyini gözləyirdin?
- Bu qərarı Yaşar müəllim verdi. Mən deyim? Ümumilikdə məşqçi işi belədi. Bir gün bu komandadasan, sabah başqa yerdə. Komanda normal nəticə verirsə, məşqçini hamı tərifləyir, əksi olanda ilk növbədə çalışdırıcını günahlandırırlar. Vahabzadəyə gələcək işlərində uğurlar arzulayıram.

- Gəncədə belə fikir formalaşıb ki, “Kəpəz”də ancaq gəncəli mütəxəssislər çalışmalıdı. Sənin bu məsələyə münasibətin necədi?
- Artıq neçə vaxtdı burdayam. Ancaq hələ ki heç kimdən belə fikir eşitməmişəm və ya hiss etməmişəm. Ola bilsin, sosial şəbəkələrdə kimlərsə nəsə yazır, subyektiv fikirlərini paylaşır. Lakin bu o demək deyil ki, məhz belə də olmalıdı. Yenə deyirəm, Gəncədə olduğum müddətdə heç kimin belə düşündüyünü görməmişəm. Ölkəni bölgələrə bölmək nə dərəcədə düzdü? İstər məşqçi, istərsə də futbolçu komandaya xeyir verirsə, kollektivdə heç bir problem yaşanmırsa, onun hardan olması vacib deyil. Məşqçi lap əcnəbi olsun. Gəncə azarkeşi üçün əsas “Kəpəz”in uğur qazanmasıdı.

- Ötən həftə “Səbail”ə məğlub olduğunuz matçda rəqibin baş məşqçisi Mahmud Qurbanovla aranızda xoşagəlməz insident yaşadı. Mütəxəssis yayda səni komandadan kənarlaşdırdığına görə aqressiv olduğunu söylədi. Sən isə mətbuata məhz Qurbanovun təkidi ilə hakimin qırmızı vərəqə göstərdiyini bildirmisən.
- Bu haqda danışmaq istəmirəm.

- Ancaq həmin an sənin meydanda qeyri-etik ifadələr sələndirdiyini media tribunasında oturanların hamısı eşitdi. Gəl əvvəlcə onu aydınlaşdıraq ki, söyüşlər kimə ünvanlanmışdı?
- Oldu, qurtardı. Bunu şişirtməyin, gündəmdə saxlamağın nə mənası var?

- Mahmud bəyin “yayda onu komandadan kənarlaşdırdığıma görə aqressiv idi” fikri ilə razılaşırsan?
- Ürəkbulandırıcı söhbətlər etməyin mənası yoxdu. Belə mənasız fikirlərə münasibət bildirmək istəmirəm.

- Matçdan sonra “Səbail”in baş məşqçisi ilə görüşdün və ya zəngləşdin?
- Nə görüşmüşük, nə də zəngləşmişik. Buna ehtiyac yoxdu.

RƏŞAD