Sənan Qurbanov: “PRO-nu alandan sonra evdə oturmaq fikrim də yoxdu”
Dekabrın 20-də iki mütəxəssisə PRO lisenziyası təqdim olundu. Söhbət Sənan Qurbanovla hazırda "Şamaxı"nın əvəzedicilərdən ibarət komandasının baş məşqçisi olan Zaur İsmayılovdan gedir.
Football-plus.az xəbər verir ki, onlara diplom və sertifikatları AFFA-nın Texniki direktoru Cahangir Həsənzadə və Təhsil proqramının rəhbəri Aslan Kərimov təqdim edib.
Maraqlıdı, PRO kateqoriyasını almaq onlar üçün nə dərəcədə çətin olub? Ümumiyyətlə, bu lisenziya adıçəkilənlərin fəaliyyətinə necə təsir edəcək? Bu sualları Sənan Qurbanova ünvanladıq:
“Bilirsiz ki, bu proses iki il davam etdi. PRO tam fərqli formatda gedir. Bir neçə moduldan ibarətdi. Canlı məşqlər də daxil olmaqla, illik proqram tərtib etdik. Fiziki hazırlıq modulları da oldu. Hər bir iştirakçı tələblərə uyğun ölkə xaricində də olmalıydı. Mən də Sloveniya və İtaliyada oldum. Orda həftəlik proqram üzərində işləyən bir komandanı təhlil etməliydim. Bütün bunlar həm çox həyəcanlı, həm maraqlı, həm də maariflənmə baxımından mənim üçün çox faydalı oldu. Ali diplom olduğuna görə, təbii ki, məsuliyyət daha da artdı. Praktik imtahanı da yaxşı verdim və 2 ilin sonunda PRO-nu ala bildim. Praktik imtahanda hər bir iştirakçının öz klubu olmalı idi. “Keşlə”dən ayrılandan sonra “Qaradağ Lökbatan” rəhbərliyi ilə anlaşdım. Sağ olsunlar ki, məni qəbul etdilər. Həm şifahi, həm də praktik imtahanı bu komandanın tərkibində verdim. “Qaradağ Lökbatan”la qışa qədər anlaşmışdıq. Bu komandaya uğurlar arzuladım və yeni təkliflər gözləyirəm. Təbii ki, PRO-nu alandan sonra evdə oturmaq fikrim də yoxdu. Futbol elə bir idmandı ki, gərək daim fəal olasan. “Mütləq premyer-liqadan təklif gözləyirəm” deyə bir şey də yoxdu. Hər bir komandanın öz baş məşqçisi var, onlara uğurlar arzulayıram. İstənilən təklifi dəyərləndirəcəyik”.
ŞAİR ABDULLA
Digər xəbərlər
