Elmar Baxşıyevlə Vüqar Əsgərli PRO-nun sevincini yaşayır
AFFA-nın Təhsil və Reabilitasiya mərkəzində UEFA-nın PRO kateqoriyalı məşqçi kurslarını müvəffəqiyyətlə başa vuran mütəxəssislərə dünən müvafiq diplom və lisenziyalar təqdim olunub.
Bu xəbəri assosiasiyanın rəsmi saytı yayıb. Diplom və lisenziyaları AFFA-nın baş katibi Sərxan Hacıyev, Texniki direktor Cahangir Həsənzadə və kursların təlimatçısı Aslan Kərimov verib. Zəhmətinin bəhrəsini görənlər arasında "Qəbələ"nin baş məşqçisi Elmar Baxşıyev və "Şamaxı"nın çalışdırıcısı Vüqar Əsgərli də var. “Şirlər” dünən doğma meydanda “Sumqayıt” üzərində qələbə qazanaraq baş məşqçisini təbrik etdi. Elmar Baxşıyevin çalışdırdığı “Qəbələ” isə bu gün “Neftçi”nin qonağı olacaq. Ümid edək ki, PRO kateqoriyası adı çəkilənlər üçün uğurlu olacaq. Yeni kateqoriya ilə bağlı fikirlərini öyrənmək üçün hər iki mütəxəssislə əlaqə saxladıq.
Vüqar Əsgərli:
“Həqiqətən də, çox sevincliyəm. İki ildən artıqdı PRO kateqoriyasını almaq üçün kurs keçdik. Bu müddət ərzində həm taktiki, həm fiziki bilikləri instruktorların sayəsində öyrəndik. Avropada və dünyada baş verən yenilikləri mənimsədik. Azərbaycanlılar bir addım öndədi. Çünki bizi marifləndirən şəxs Aslan Kərimovdu. Bu, bizim üçün üstünlükdü. Çünki həmişə fikir mübadiləsi aparmağa meyilli şəxsdi. Mənim üçün daha yaxşı oldu. Ona görə ki, əldə etdiyim bilikləri öz komandamda tətbiq edə bilirdim. Bunda mənə Aslan müəllim çox kömək etdi. Ümid edirəm ki, həm öz gələcəyim, həm də komandam üçün xeyirli olar”.
Elmar Baxşıyev:
“İlyarım çox faydalı tapşırıqları yerinə yetirdik. Müxtəlif məlumatlar əldə etdik. AFFA rəhbərliyinə təşəkkür edirəm. Əsasən də instruktorlara - Aslan, Osman və Cahangir bəylərə minnətdaram”.
İLKİN SULTANLI
Digər xəbərlər
