Əmrə Belözoğlu: “Arda Gülərdə olan istedad heç birimizdə olmayıb” - AÇIQLAMA
15-ci pillədə qəbul etdiyi ''İstanbul BŞ''ni 4-cü sıraya yüksəldən və Konfrans Liqasına vəsiqə qazandıran Əmrə Belözoğlu Türkiyə mətbuatına açıqlamalar verib.
"Football-plus.az" xəbər verir ki, 41 yaşlı mütəxəssis başakşəhərlilərin başındakı uğuru, ''Fənərbaxça''ya qayıtmaq perspektivi və Türkiyə futbolunun yeni ulduzu Arda Gülər haqda danışıb.
Xatırladaq ki, Əmrə 2020/21-in son 10 turunda ''Fənər''i uğurla çalışdırmış və yeganə məğlubiyyət üzündən çempionluğu əldən vermişdi. Daha sonra isə ''Fənər'' onunla vidalaşıb Vitor Pereyra ilə anlaşmışdı. Əmrəni dinləyək: ''Əlimdən gələn qədər köməkçilərimlə birlikdə komandaya baxımlı oyun aşılamağa çalışdım. Oyunçular da buna çox yaxşı reaksiya verdilər, bütün göstərişlərimi canla-başla yerinə yetirdilər. Yəni komandada yaxşı ab-hava formalaşdı. ''İstanbul BŞ''yə gəlişim hər iki tərəf üçün uğurlu addım oldu. Şükürlər olsun ki, qarşıya qoyulan hədəfə çataraq avrokuboklara vəsiqə qazandıq. Əlimizdə olan heyət pis deyil. Amma bir qədər də səviyyəli oyunçularla güclənməyə, rəqabəti artırmağa ehtiyacımız var. Ən azı 3-4 yeni futbolçu alacağıq. Mən ötən mövsüm ''Fənərbaxça''da idman direktoru olarkən Arda Gülərin 15 yaşı var idi. Həmin vaxt onunla ilk peşəkar müqavilə imzaladıq. Bəlkə də iddialı səslənəcək, mən özüm çox istedadlı idim. O vaxt ''Qalatasaray''da Tuqay Kərimoğlu da çox istedadlı idi. Amma sizi əmin edirəm ki, Arda Gülərdə gördüyüm istedad 16 yaşda bizim heç birimizdə olmayıb! Onu doğru şəkildə inkişaf etdirməliyik. Bu torpaqlarda yetişən hər bir dəyərə sahib çıxmalıyıq. İnkişafını hər birimiz görəcəyik. Mən şəxsən Ardanın böyük futbolçu olacağını və Avropada ölkəmizi təmsil edəcəyini düşünürəm. Həyatda hər birimizin arzuları var. Mənim də arzum ''Fənərbaxça''ya qayıtmaqdı. Bəziləri belə şeylərə yarımçıq qalmış hekayənin davamı deyir. Amma mənim üçün ''Fənərbaxça'' heç vaxt hekayə deyil, həyatın özüdü. Bu komanda daim qəlbimin ən gözəl yerindədi. Allah qismət eləsə, məşqçi kimi bir qədər inkişaf etdikdən və təcrübə qazandıqdan sonra ora qayıdacam. Bunu həyata keçirə biləcək gücüm də var, potensialım da''.
Digər xəbərlər
