DİN azarkeşlərin saxlanılmasına reaksiya verdi: “Onlar ictimai qaydaları pozub”
Misli premyer-liqasının 16-cı turunun “Neftçi” – “Qarabağ” matçında qonaq komandanın azarkeşləri saxlanıldı.
Football-plus.az xəbər verir ki, məsələ ilə bağlı “İmarət” azarkeş qrupu bəyanat yaydı. Qrup iddia edir ki, üzvlərinin saxlanılmasına oyundan öncə stadiona yürüş təşkil edərkən pirotexniki vasitələrdən yararlanmaları səbəb olub. Adı açıqlanmayan azarkeşlərdən biri 500 manat cərimə edilərək sərbəst buraxılıbsa, digəri, yəni Rüfət Muradi 8 sutka həbs cəzası alıb.
Hadisə mediada əks-səda doğurdu. Belə ki, əksəriyyət azarkeşlərin tərəfini saxlayaraq onların qanunsuz şəkildə saxlanıldığını bildirir. Məsələ ilə bağlı idman hüquqşünası Elcan Həsənli qəzetimizin ötən sayına açıqlama verib. O da azarkeşlərin qanunsuz şəkildə saxlanıldığını iddia edib. Belə olan halda isə ortaya sual çıxır: azarkeşlər həqiqətən də haqsız yerə saxlanılıb? Ümumiyyətlə, azarkeşlər hansı maddə ilə saxlanılıb?
Bu suallara cavab tapmaq üçün Daxili İşlər Nazirliyinin mətbuat xidmətinin rəhbəri Elşad Hacıyevə müraciət etdik:
“Həmin azarkeşlərin barəsində inzibati tənbeh tədbirləri tətbiq olunub. Bu da ondan irəli gəlir ki, onlar ictimai qaydaları pozub. Yəni təhlükəsizliyə mane olaraq pirotexniki vasitələrdən istifadə ediblər. Eyni zamanda oyunun gedişində də yasaq əşyalardan istifadə halı aşkar olunub. Azarkeşlərin saxlanılmasına səbəb bu olub. Orda başqa hal yoxdu. Buna görə də barələrində qanuna müvafiq qaydada tədbirlər görüldü. Azərbaycanda idman oyunlarında ictimai qaydanın və təhlükəsizliyin qorunması ən yüksək səviyyədə təmin olunub. Hansısa neqativ hallar baş verəndə, buna şərait yaradan şəxslərlə bağlı profilaktik tədbirlərin görülməsi diqqət mərkəzindədi”.
Azərbaycan Respublikasının İnzibati Xətalar Məcəlləsinin maddələrinə də nəzər saldıq. Belə ki, bədən tərbiyəsi-idman obyektlərinin ərazilərinə və tamaşaçılar üçün nəzərdə tutulan yerlərə “Bədən tərbiyəsi və idman haqqında” Azərbaycan Respublikasının Qanununa görə daxil olmasına yol verilməyən şəxslərin buraxılmasına, həmin məkanlarda eyni qanunla qadağan edilmiş əşyaların istifadəsinə, hərəkətlərin edilməsinə görə fiziki şəxslər 500, vəzifəli şəxslər 2000, hüquqi şəxslər isə 5000 manat cərimə olunur.
Yeri gəlmişkən, “İmarət”in idarə heyətinin üzvü Rüfət Muradi şənbə günü azadlığa çıxacaq.
ŞAİR ABDULLA
