Premyer-liqanın 16-cı turunun "Neftçi" - "Qarabağ" (0:4) matçından sonra polis 2 azarkeşi saxlayıb.

Football-plus.az Ağdam təmsilçisinin fanatları 8 sutkalıq həbs olunub. Görəsən, bunun əsası var? Qanunvericilikdə bu məsələ necə tənzimlənir? Bununla bağlı idman hüquqşunası Elcan Həsənliyə müraciət etdik:

"İmarət" azarkeş qrupunun 2 üzvünün dekabrın 2-də baş tutan "Neftçi" - "Qarabağ" oyunundan öncə stadiona yürüş edərkən pirotexniki vasitələrdən istifadə etdiyi üçün saxlanılaraq İnzibati Xətalar Məcəlləsinin 514-ci maddəsi ilə inzibati məsuliyyətə cəlb edilərək 500 manat cərimə olunması tam qanunsuz bir qərardı. Belə ki, İXM-nin 514-cü maddəsində birbaşa qeyd edilir ki, kütləvi idman tədbirlərinin və idman yarışlarının keçirilməsinə mane olma.

514.0.2. bədən tərbiyəsi və idman obyektlərinin ərazilərində və tamaşaçılar üçün nəzərdə tutulmuş yerlərdə “Bədən tərbiyəsi və idman haqqında” Azərbaycan Respublikasının Qanunu ilə qadağan edilən əşyaların istifadəsinə, hərəkətlərin edilməsinə görə məsuliyyətə səbəb olur.

"Bədən tərbiyəsi və idman haqqında” AR Qanunun 40-1.2. Kütləvi idman tədbirlərinin və idman yarışlarının keçirilməsi zamanı idman obyektlərinin ərazilərinə və tamaşaçılar üçün nəzərdə tutulmuş yerlərə yarış iştirakçılarının və tamaşaçıların təhlükəsizliyinin təmin olunması və ictimai asayişin mühafizəsi məqsədi ilə aşağıdakı şəxslərin və əşyaların buraxılmasına yol verilmir:

40-1.2.4. bütün növ alkoqollu içkilər; narkotik vasitələr, psixotrop maddələr, onların analoqları, toksik təsir göstərən maddələr; soyuq, odlu, qaz və digər tipli silahlar, silahların ayrı-ayrı hissələri, partlayıcı maddələr və döyüş sursatları, həmçinin soyuq, odlu, qaz və digər silahlara, partlayıcı maddələrə və döyüş sursatlarına oxşar vasitələr; pirotexniki vasitələr; insanların həyatına və sağlamlığına təhlükə törədə, fiziki və hüquqi şəxslərə maddi ziyan vura, kütləvi idman tədbirlərinin keçirilməsinə maneələr yarada bilən xüsusi hazırlanmış və ya uyğunlaşdırılmış vasitələr.

İlk növbədə bu əməl idman obyektlərinin ərazisində və tamaşaçılar üçün nəzərdə tutulan yerlərdə törədilməlidi. Əlavə olaraq da bu əməl kütləvi idman tədbirlərinin və idman yarışlarının keçirilməsinə mane olmadı. İAQ qeyd etdiyi kimi oyundan əvvəl və idman obyektinin ərazisində baş vermirsə, İXM 514-cü maddəsinin tərkibini yaratmır və bu maddə ilə şəxs inzibati məsuliyyətə cəlb edilə bilməz".

İLKİN SULTANLI