"2 dekabr 2022-ci il tarixdə keçirilən "Qarabağ" - "Neftçi" matçından əvvəl oyunun keçirildiyi stadiona doğru yürüyüşlə gedən azarkeş qrupumuzun 3 nəfər üzvü pirotexniki vasitədən istifadə etdiyi əsas gətirilərək Nizami Rayon Polis İdarəsinə aparılmışdı.

Bir nəfər üzvümüz polis tərəfindən İnzibati Xətalara Məcəlləsinin 514-cü maddəsi, yəni ”Kütləvi idman tədbirlərinin və idman yarışlarının keçirilməsinə mane olma” maddəsi ilə 500 manat cərimə edilmiş, digər üzvümüz isə Nizami Rayon Məhkəməsi tərəfindən İnzibati Xətalar Məcəlləsinin 535-ci, yəni “Polis işçisinin və ya hərbi qulluqçunun qanuni tələbinə qəsdən tabe olmama” maddəsi ilə 8 sutka inzibati həbs cəzası almışdı.

Xatırladaq ki, üzvülərimizə təyin edilən hər iki tənbeh növünün hüquqi əsas yoxdu. Tək səbəb oyundan əvvəl azarkeşlərin pirotexniki vasitədən istifadə etməsidi ki, buna görə də hər hansı bir məsuliyyət nəzərdə tutulmayıb.

İmarət Azarkeş Qrupu olaraq, futbol ictimaiyyətinə və hüquq mühafizə orqanlarına xitabən bildirmək istəyirik ki, dünyanın heç bir yerində, heç bir azarkeş stadiona gələrkən fakel yandırdığı üçün yolda saxlanılıb polis bölməsinə aparılmır və ya həbs edilmir.

Bütün bu baş verənlər Azərbaycanda yeni-yeni formalaşmağa başlayan azarkeş qruplarına zərbə, gənc yaşda olan azarkeşlərin ruhdan salınmasına yönəlmiş hərəkətdi.

Hər kəsi azarkeş qrupu barədə fikirlərini təkmilləşdirməyə və azarkeşlərə qarşı ədalətli davranmağa dəvət edirik.

Əks halda, onsuz da heç bir gələcək vəd etməyən Azərbaycan futboluna, o cümlədən heç kəsə lazım olmayan boş tribunalara ancaq özünüz baxmalı olacaqsınız.

Bizim dərdimizin futbol olmadığı zatən hər kəsə bəllidi!"