“Səbail” Mirbağır İsayevlə bağlı qərarla razılaşmır
AFFA İntizam Komitəsinin dekabrın 2-də keçirilən iclasında U-17 liqasının "Səbail" - "Turan Tovuz" oyununda meydan sahiblərinin akademiyasının əlaqələndiricisi Mirbağır İsayevin rəsmi şəxsləri təhqir etməsiylə bağlı ölçü götürülməsi diqqəti çəkdi.
Football-plus.az xəbər verir ki, mütəxəssis bu hərəkətinə görə 3 aylığa futboldan uzaqlaşdırılıdısa, klub 4000 manat cərimələndi.
Yadınızdadısa, akademiyanın məşqçisi Ramal Hüseynov da bir müddət öncə oxşar hadisəyə görə futboldan 2 illik uzaqlaşdırılmışdı. Bu isə “Səbail”də intizamla bağlı ciddi qüsurların olduğuna işarədi. Amma dünən əlaqə saxladığımız klubun icraçı direktoru Fərəc Əliyev tam fərqli fikirdədi:
"Bir məsələni xüsusi vurğulayım ki, klubumuzda çalışan şəxslər, o cümlədən Mirbağır İsayev söyüş-təhqirə yol vermir. Son olayla bağlı araşdırma apardıq. Mirbağır müəllimlə söhbət etmişik. O vurğulayır ki, söyüş-təhqirdən söhbət gedə bilməz. Sadəcə, anlaşılmazlıq olub. İntizam Komitəsinin qərarını ədalətsiz sayırıq. Ona görə də apellyasiya şikayəti verəcəyik. Yalnız qərar açıqlanandan sonra daha geniş məlumat verəcəyik".
Klub rəsmisinin açıqlamasından sonra AFFA İntizam Komitəsinin sədri Erkin Hüseynova da müraciət etdik:
"Əvvəla onu xüsusi vurğulayım ki, oyundan sonra hakimin yazılı məruzəsi bizə təqdim olundu. Məhz onun əsasında araşdırma aparandan sonra Mirbağır İsayevlə bağlı cəza təyin etmişik. Bundan başqa, həmin yoldaş əvvəllər də problemlər yaratmışdı və İntizam Komitəsi tərəfindən cəzalar almışdı. İsayevlə bağlı təyin etdiyimiz son cəzanın qüvvədə qalıb-qalmayacağına Apellyasiya Arbitraj Tribunalı qərar verəcək".
ABDULLA İSMAYILOĞLU
