Rəşad Sadıqov: "Orxan Məmmədova deyirəm ki, bəlkə lazım olanda 10-15 dəqiqə bizim komandada oynayasız"
Bu gün premyer-liqanın 16-cı turunda "Zirə" "Turan Tovuz"a 2:1 hesabı ilə qalib gəldi.
Football-plus.az xəbər verir ki, oyundan sonra keçirilən mətbuat konfransında meydan sahiblərinin çalışdırıcısı Rəşad Sadıqov qələbəni şərh etdikdən sonra jurnalistlərin suallarını cavablandırdı:
"Hər oyun vacibdi. Bu görüş də onlardan biri idi. Bu matçla sübut olundu ki, çempionatda rahat qalib gələ bilinəcək komanda yoxdu. Düşündük ki, 85–86-cı dəqiqədi. 2:0 irəlidəyik və oyun daha rahat olacaq. Ancaq əksini gördük. “Turan Tovuz” futbolçuları qol vuraraq matça intriqanı qaytardılar. Buna rəğmən futbolçularımı təbrik edirəm. Çox yaxşı oyun sərgilədilər. Rəqib çempionatın ən möhkəm klublarından biridi. Hamımız bilirik ki, Ayxan müəllimin işlədiyi bütün klublarda xarakter və intizam ilk cərgədə olub. Buna rəğmən oyunu üstün keçirdik, lakin Kamal Bayramov hardasa 5-6 yaxşı seyv etdi. Bu da futbolçularda gərginlik yaradırdı. Sonluq biz istədiyimiz kimi oldu və qalib gəldik".
- Oyun boyu üstün futbol sərgilədiniz. Qolların belə gec gəlməyinə səbəb nə idi?
- Həm Kamalın ustalığı, həm rəqib komandanın etibarlı oynaması, həm də son zərbələrdə həyəcanlı olmağımız. Səbəb budu. Bu gün oyun bərabərə bitsəydi, yenə oyunçularımın çıxışındab razı qalacaqdım. Matç elə gedirdi ki, heç-heçəyə doğru irəliləyirdik Şanslardan istifadə edə bilmədikcə bu futbolçularda stress yaratdı. Yaxşı ki, standart vəziyyətdən istifadə etdik və qalib gəldik.
- Kubok oyunu barədə fikirləriniz maraqlıdı. Heç də yaxşı vəziyyətdə olmayan “Neftçi” ilə qarşılaşacaqsız. Bu oyundan nə gözləyirsiz?
- Son dəfə də “Sabah” “Neftçi” üzərində qələbə qazandıqda, növbəti oyununu bizlə keçirtdi və inamlı qələbə qazandı. Buna görə də biz belə şeyləri düşünmürük. Qarşımızda ən güclü “Neftçi”ni gözləyirik və buna uyğunda hazırlaşıb meydanda mübarizə aparmaq istəyirik.
- Bir müddət öncə şirkətlərarası çempionatda KOBİA SOCAR-ı məğlub etdi. Qolu da "Zirə"nin Müşahidə Şurasının rəhbəri Orxan Məmmədov vurdu. İndi onun komandası kubokda SOCAR-ın sponsorluq etdiyi "Neftçi" ilə qarşılaşacaq. Sizdən bu görüşdə qələbə qazanmağınızı tələb etməyib ki?
- Biz bu haqda düşünmürük. Ümumiyyətlə, şirkətlər arasında çempionat gedir. Maraqlı oyunlar olur. Arada mən də izləyirəm. Orxan müəllimin futbol istedadı çox yaxşı bilirəm. Düzdü, yayına 1 qol düşdü. Amma 30-40 maraqlı qolu var. Bəzən zarafat edirik. Orxan Məmmədova deyirəm ki, bəlkə lazım olanda 10-15 dəqiqə bizim komandada oynayasız (gülür)? Həm istedadlı insandı, həm də futbolu yaxşı bilir. Çox vaxt da oyunları izləyir. Həmin məqamda da baxımlı qol vurdu. Bir növ bu gün Keyta onun kimi fərqləndi. Solu göstərdi, sağa çəkdi və ustalıqla zərbə endirdi. Sevinirdim onun və komandasının adına. Amma bunu bizim komandanın oyunu ilə bağlamaq düzgün olmazdı.
Digər xəbərlər
