Premyer-liqanın 12-ci turunda "Sabah" "Qəbələ"ni məğlub etdi - 2:1.

Football-plus.az xəbər verir ki, oyundan sonra keçirilən mətbuat konfransında meydan sahiblərinin baş məşqçisi Murad Musayev qələbəni şərh etdikdən sonra jurnalistlərin suallarını cavablandırdı:

Komandanı, rəhbərliyi azarkeşlərimizi təbrik edirəm. Xarakter göstərdik. Oyuna yaxşı başlamadıq, geri düşdük. Son dəqiqəyə qədər mübarizə apardıq. Bu, vacib idi. İşlərimiz çoxdur. Bu qələbə bizim üçün önəmli idi. Yorulmadıq. Bunlar məşqlərdə səylə çalışmağımızın nəticəsidi. Mən sizə bir şey demək istəyirəm. Rəqiblər bundan sonra hər kiçik toxunuşda yerdə qalacaqsa, biz topu kənara çıxarmayacayıq. İki dəqiqədən bir yerə uzanacaqlarsa, oyunumuza davam edəcəyik. Bunun feyr-pleylə əlaqəsi yoxdu.

- Bu, cəsarətli çağırış idi. Buna görə qınanacağınızı düşünmürsüz?
- Bizim işimiz tənqid olunmaqdı. Belə şeylərə görə temp aşağı düşür. Avrokuboklarda belə oynanılacaq? Futbol hiyləgərliyi var. 1-2 dəfə edilməsi qəbuldu, amma 10-15 dəfə təkrarlanırsa, düz deyil. İlk dəqiqədən belə bir şey olmamalıdı. Bu gün "Şamaxı" - "Qarabağ" oyununa baxdım. İlk hissədə "Şamaxı"nın bütün oyunçuları yerə yıxılırdı. Ciddi zədə olsa, başa düşərik, amma belə yox.

- Komandada gərginlik hiss olunurdu. Bu, nə ilə bağlı idi?
- Turnir cədvəlinə baxmamalıyıq. Oyuna pis başlasaq da, 10 dəqiqə sonra düzəldik. Rəqib əks-hücumlarda təhlükəli idi.

- Rəqib baş məşqçi Elmar Baxşıyev futbolçunuz Elvin Camalovun qırmızı vərəqə almalı olduğunu dedi. Razısız həmkarınızla?
- Xeyr. Oyun epizodu idi. "Qəbələ"nin də çox oyunçusuna "sarı" verilməli idi. Mən hər zaman sərt oyuna üstünlük vermişəm.

- Elvinin əvəzlənməsi sarı vərəqəsi olduğu üçün idi?
- Bəli, risk etmədim. Bir dəfə top əlinə dəydi, bir dəfə də hücumun qarşısını aldı, amma bu, təhlükəli hücum deyildi. Hakimə də təzyiq var idi. "Qəbələ"yə qarşı simpatiyam var. Yaxşı futbol oynayırlar. Matçdan sonra da rəqib baş məşqçinin əlini sıxdım. Onlara uğurlar arzu edirəm.