Misli premyer-liqasının 13-cü turunda "Qəbələ" "Zirə"ni 1:0 hesabı ilə məğlub etdi.

Football-plus.az xəbər verir ki, görüşdən sonra meydan sahiblərinin baş məşqçisi Elmar Baxşıyev mətbuat konfransında iştirak etdi.

Təcrübəli mütəxəssis görüş haqda fikirlərini səsləndirdikdən sonra jurnalistlərin suallarını cavablandırdı:

- Ülvi İsgəndərovu meydana buraxdız və o, mərkəzdən qol vuraraq, komandaya qələbə qazandırdı...
- Ülvidən həmişə qeyri-adi nəsə gözləmək olar. Bunu dəfələrlə göstərib. Çempionatda qeyri-adi hücumçulardandı. Oyunun taleyini hər an dəyişə bilər. Üzərinə nə düşürdüsə, onu etdi.

- Asif Məmmədovun oynamaması nə ilə bağlıdı?
- Mikro-zədəsi var idi. Rafael Utzdiqdə də həmçinin. Buna görə ehtiyat etdik.

- 4 oyunluq qələbəsizlik seriyasını qırdız. Növbəti rəqib “Neftçi”di. Bu qələbə sizə əlavə motivasiya olacaq?
- Hamı məğlubiyyətimizi bir cür müzakirə edir. Komandanın içindəyik. Heç bir sıxıntımız yoxdu. Komanda olaraq möhkəmik. Hər şey qaydasındadı. Oyun oyundan fərqlidir. Son matçda məğlub olsaq da, komandaya irad bildirə bilməzdik. Sona kimi vuruşmuşdular. Bəzən qələbə qazanırsan, bəzən uduzursan. Avrokubok zonasından qopmamağa çalışacağıq.

- Avrokuboka iddialı iki komanda üz-üzə gəlirdi. Oyunun keyfiyyətindən razı qaldız?
- Futbolçuları da başa düşmək lazımdı. Boş tribunada futbol oynanılmır. Daha çox məşq oyununa oxşayırdı. Azarkeşləri qırıb atmaq futbolun gözəlliyini də azaldır. Qarşıdakı matçlarda bir də belə halın təkrarlanmayacağına ümid edirəm.