Tərlan Əhmədov: "Məğlubiyyətin səbəbkarı başda mənəm"
Misli premyer-liqasında 16-cı turun matçları keçirilir.
"Kəpəz" evdə "Sumqayıt"a uduzub - 0:1. Oyundan sonra meydan sahiblərinin çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:
"Nə qədər olsa da, məğlubiyyət xoş deyil. Bu, hər zaman acı olur. Ən ağır oyunlarımızdan biri olacağını demişdim. Kubokda qalib gəldiyiniz rəqibə qarşı növbəti oyunda az da olsa, arxayınlıq olur. İki oyunçunun - Zamiq Əliyevlə Giorgi Kantariyanın olmaması orta xətdə bütün oyun sxemimizi pozdu. Topa nəzarəti itirmişdik. Məğlub olduq, bunu geri qaytarmaq olmur. İrəli baxmalıyıq. Hərdən enməlisən ki, qalxa biləsən. Uğurlu seriyamızın davamını gətirmək istəyirdik, alınmadı. Hər halda, məğlubiyyətin səbəbkarı başda mənəm".
- Futbolçular sanki irəli oynaya bilmirdi. Problem nə idi?
- Orta xətdə problemlər var idi. Giorgiyanın olmaması Ahmed Ayzayaya da təsir etdi. İstər-istəməz oyun sxemimiz pozulmuşdu. İrəlidə çoxala, hücum edə bilmirdik. Məcburiyyətdən Nicat Süleymanovu mərkəzdə oynatmağa çalışdıq. Hücumda çoxluq yarada bilmədik. Bizim kimi komandaların bir oyunçudan asılılığı bu vəziyyətə gətirib çıxarır.
