"Bu, hamıya dərs olmalıdı" - Tərlan Əhmədov
Misli premyer-liqasının 10-cu turunun oyunları keçirilir.
"Kəpəz" evdə "Neftçi"yə məğlub olub - 0:2. Oyundan sonra meydan sahiblərinin çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:
"Maraqlı mübarizəyə şahidlik etdik. Oyunun əvvəlində həyəcan var idi. Bu da 4 illik fasilədən sonra böyük futbolun Gəncəyə qayıtması ilə bağlı idi. Azarkeşlərə sona kimi bizə dəstək olduqları üçün minnətdaram. Qapımızda qol gördükdən sonra komanda ayıldı. Sonradan rəqibi təzyiq altında saxladıq. Qırmızı vərəqə oyunun “sınma” nöqtəsi idi. Lakin azlıqda qaldıqdan sonra da yaxşı mübarizə apardıq. Qol şanslarımız da oldu. Bununla belə, “Neftçi” kimi komandaya qarşı azlıqda oynamaq çox çətindi. Komanda hələ tam mən istəyən formada deyil. Ehtiyat oyunçular skamyamızın azlığı da öz sözünü deyir. 4 il qabaq bu stadionda “Neftçi”nin baş məşqçisi kimi qələbə qazanmışdım. Bu gün təəssüf ki, “Kəpəz”in baş məşqçisi kimi məğlub oldum".
- Qırmızı vərəqə yersiz idi. Buna görə futbolçunuzu cəzalandıracaqsız?
- Bəli, çünki ilk gündən demişəm ki, son ümid folu kimi alınan qırmızı vərəqəni anlayışla qarşılayıram. Amma bu cür qırmızı vərəqəyə görə futbolçu mütləq cəzalanacaq. Komanda yaxşı oynadığı dəqiqələrdə qırmızı vərəqə yersiz idi. Hakimin qərarı doğru idi. Buna görə də Zamiq Əliyev mütləq cəzalanacaq. Futbolçu oynadığı komandanın dəyərlərinə hörmətlə yanaşmalıdı. Bunu onun cavanlığı ilə bağlamaq olar. Lakin futbolçu da başa düşməlidi ki, komandanı pis vəziyyətdə qoymaq olmaz. Pul cəzası mütləq olacaq.
- Bir müddət əvvəl xorvat qapıçı transfer etmişdiz. Onun durumu nə yerdədi?
- Bir qədər problemlər çıxıb. Hazırda meneceri ilə danışıqlar gedir. Bu barədə açıqlama veriləcək.
- Əvəzedici heyətə göndərdiyiniz Əli Səmədov bu məsələni araşdıracağını deyib...
- Bütün dünyada belədi ki, şirkət rəhbəri əməkdaşına iş tapşıranda həmin işi istədiyi kimi yerinə yetirmədən narazılıq olur. Mən də bura gəldiyim ilk gündən demişəm ki, tapşırıqlar mütləq yerinə yetirməlidi. Paltardəyişmə otağında da izah etdim ki, ev tapşırıqları mütləq icra olunmalıdı. Əli Səmədov isə bu tapşırıqları yerinə yetirmədiyi üçün əvəzedici heyətə göndərilib. Bu, hamıya dərs olmalıdı.
- Komandanız artıq 4 qırmızı vərəqə alıb. Halbuki təqdimatınızda demişdiniz ki, nizam-intizama önəm verirəm...
- 1 aya hər şeyi dəyişmək olmur. Üstəlik, heyətimiz kasaddı. Bu da bəzi oyunçularda arxayınçılıq yaradır. Bununla belə, çalışırıq dəyişiklik edək. Qırmızı vərəqələr qaçılmazdı. Lakin cəzalar kəsildikcə futbolçular nizam-intizama daha çox önəm verirlər. Bəzən qırmızı vərəqə istəyin çoxluğundan, aqressivlikdən də olur.
- 5-ci oyunda 3-cü məğlubiyyətiniz. Tərlan Əhmədov “Kəpəz”də nəyi dəyişib?
- Komandada oyun sistemini dəyişmişəm. Çalışıram daha çox hücuma atılaq. Bura gələrkən futbolçular sanki futboldan küsmüşdülər. Oyundan oyuna inkişaf var. İndi istək daha çoxdu. Məğlubiyyətlərlə yanaşı, 2 oyunda 4 xal da qazanmışıq. Stabil çıxış etməməyimizin səbəbi ehtiyat oyunçuların azlığıdı. Bir gün yaxşı oynasan da, növbəti oyunda oyunçu azlığına görə problem yaşayacağıq.
- Gəldiyiniz gündən 2 futbolçunu əvəzedici heyətə göndərmisiz. Futbolçuların sizə qarşı qruplaşma yaradacaqlarından qorxmursuz?
- Çalışmışam komandada nizam-intizam olsun. Kollektivdə heç kim heç kimdən üstün deyil. Kimsə cəzalanıbsa, deməli, buna layiqdi. Bu, digərlərinə də dərs olmalıdı. Heç nədən qırmızı vərəqə alan futbolçunu, komandanı maddi baxımdan ziyana salan futbolçunun sonradan bunu etməyəcəyinə kim zəmanət verə bilər? Ona görə cəza mütləq olmalıdı. Çalışıram sağlam kollektiv yaradım. Əvvəlki iş yerlərimdə elə olub ki, 16-18 futbolçu ilə nəticə qazanmışam.
Digər xəbərlər
