Hakan Şükür filmdə ona yer verilməməsi barədə nə dedi?
''Netfliks'' tərəfindən ərsəyə gətirilən və dünən ekranlara çıxan ''Terim'' adlı 4 hissəlik sənədli film Türkiyədə gündəmi zəbt edib.
Türkiyə mətbuatının yazdığına inansaq, əfsanəvi Fatih Terimin həyatından və karyerasından bəhs edən filmin ilk hissəsi ilk yarım saatda 14 milyon dəfə izlənilib ki, bu, ''La casa de papel'' (pul soyğunu) serialının birinci bölümünə məxsus olan əvvəlki rekorddan (7 milyon) iki dəfə çoxdu!
Ümumilikdə 4 saata yaxın davam edən filmdə ''Qalatasaray''ın tarix yazdığı 1996-00-ci illərdə klubun aparıcı üzvləri sayılan Hakan Şükür və Arif Ərdəm barədə bir kəlmə də deyilməməsi diqqətdən qaçmayıb. Bilindiyi kimi bu iki futbolçu klubun əfsanələrindən sayılsa da, xaricdə yaşamağa məcburdular. Fətullah Gülən tərəfdaşı olduqları üçün Türkiyədə haqlarında həbs qərarı verilən sabiq ulduzlar uzun illərdi ABŞ-da yaşayırlar. Bu arada sosial şəbəkədəki səhifəsində filmlə bağlı fikirlərini bölüşən Şükür bunları deyib:
''Dəyərli baş məşqçim Fatih Terim haqda çəkilən film xeyirli, uğurlu olsun. Orda mənə yer verilmədiyini xatırladan və buna üzülən hər kəsə də təşəkkürümü bildirirəm. Məncə, bu platforma və Terim məndən bəhs etməməklə daha çox diqqət cəlb etdilər. Bu, kimin fikridisə, özü də bilmədən məni gündəm mövzusuna çevirib. Ən azı Arifə qarşı bu cür haqsızlıq edilməməli idi. Uzun illərdi səsi çıxmır və heç nə danışmır. Bu uğurlarda əməyi çox olub. Bu, çox ayıb bir hərəkətdi''.
Bundan başqa Türkiyənin məhşur şərhçilərindən olan Adnan Aybabanın da filmdəki bir səhnə barədə fikirləri maraq doğurub. 2012-ci ildə bilindiyi kimi ''Qalatasaray'' Terimin başçılığı altında son turda ''Fənərbaxça'' ilə heç-heçə oynamış və əzəli rəqibinin meydanında çempion olmuşdu. O vaxt stadionun işıqları söndürülmüş və ''Qalatasaray''lılar faktiki olaraq qaranlıqda kubok qaldırmışdılar. Adnan Aybaba filmdə bu mövzuya həsr olunmuş kadrlarla bağlı bunları yazıb:
''Filmdə mayın 12-də yaşananlar Terimin və ''Qalatasaray''ın gözündən verilir. Halbuki ''Fənərbaxça'' o günlərdə böyük bir oyunun və yalanın qurbanı idi. FETÖ-nün polisləri həmin gün ''Fənərbaxça''nı ictimaiyyətə ən pis şəkildə təqdim etmək üçün əllərindən gələni etdilər. Bu reallığı nəinki ''Netfliks'', heç kim gizlədə bilməz''.
Digər xəbərlər
