Mundialın açılışında Azərbaycandan kimlər olacaq?
Bu gündən etibarən 29 gün ərzində bütün dünyanın diqqəti Qətərdə keçiriləcək mundila yönələcək.
Tarixdə ilk dəfə bir müsəlman ölkəsi böyük futbol bayramına evsahibliyi edəcək. Açılış oyununda meydan sahibləri Ekvadorla qarşılaşacaq və matç Əl-Haur şəhərindəki “Əl Beyt” stadionunda baş tutacaq.
Yarışın final mərhələsində 32 komanda əsas mükafat uğrunda mübarziə aparsa da, FİFA dünya çempionatına qatıla bilməyən, ancaq quruma üzv olan ölkələri də yaddan çıxarmır. Həmin ölkələrin rəsmiləri, federasiya rəhbərləri dünya çempionatına evsahibliyi edəcək ölkəyə dəvət olunur. Bəs görəsən, ali futbol qurumu bu dəfə Azərbaycana neçə dəvətnamə göndərib, kimlər böyük futbol bayramında ölkəmizi təmsil edəcək?
Bu suala cavab tapmaq üçün AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla ilə əlaqə saxladıq. Firuz bəy “Football-plus.az” saytına açıqlamasında bunları söylədi:
“AFFA prezidenti Rövnəq Abdullayev və baş katib Sərxan Hacıyev dünya çempionatının açılışında iştirak edəcəklər. Onlarla yanaşı assosiasiyanın sabiq icraçı vitse-prezidenti, hazırda FIFA-nın Avropa Milli Assosiasiyaları üzrə direktoru postunu tutan Elxan Məmmədov da Qətər-Ekvador matçını izləyənlər arasında olacaq”.
RƏŞAD
