Mel Gibsonun lentə aldığı, baş rolu da özünün canlandırdığı "Cəsur ürək" filmində Sterlinq döyüşündə ingilisləri məğlub etdikdən sonra Şotlandiya aristokratları ilə klanları yığıncaq keçirərək taxt-tac davasına başlayır.

Bunu görən Uilyam Volos döyüşçüləri ilə birgə sakitcə məclisi tərk etmək qərarına gəlir. Bu vaxt bir-biriylə didişənlərdən Kreyq cəngavərə səslənir: "Ser Uilyam, hara gedirsiz?” Volos cavabında belə deyir: "Biz ingilisləri darmadağın etdik. Amma onlar qayıdacaqlar. Siz birləşmək istəmirsiz. Mən isə İngiltərəyə soxularaq, onları öz torpaqlarında əzəcəm".

Filmdəki kimi, premyer-liqamızda da əksər klublarımızın başı güzəranlarını keçirmək, ayaqlarını yorğanına görə uzatmaqla məşğuldu. Yəni böyük düşünmək, ucalmaq istəmirlər. Bunun ən böyük səbəblərindən biri "Qarabağ"ı gözlərində həddindən çox böyütmələri və meydana çıxmadan yenilgini qəbul etmələridi. Bəli, Ağdam təmsilçisi Azərbaycan çempionatı səviyyəsini aşıb. Lakin bu, "Qarabağ” xofu"nun yaradılmasına əsas vermir. Dünya və ölkə futbolundakı nəticələr göstərir ki, heç də həmişə güclü qalib gəlmir. Ötən mövsümdə "köhlən atlar" 5 oyunda büdrədi (4 heç-heçə, 1 məğlubiyyət). "Qarabağ"a rəğbət bəsləsəm də, monoton çempionat oyunlarını, Ağdam təmsilçisinin asan çempion olmasını görmək də istəmirəm. Qurban Qurbanov və yetirmələrinin əziyyətini, sərgilədiyi performansı aşağılamaq niyyətim də yoxdu. Amma "Qarabağ"ı həddən artıq ucaltmağı, qüdrətli komanda kimi təqdim etməyi də görmək istəmirəm. 6-cı turda "Sabah" Ağdam təmsilçisinin adından, nüfuzundan, gücündən çəkinməyərək "Azərsun Arena"da, azlıqda qalmasına baxmayaraq, rəqibinə Sterlinq döyüşünü yaşatdı. Son illərdə heç avrokuboklarda da "Qarabağ"a belə meydan oxuyan olmamışdı. Masazır təmsilçisi "köhlən atlar"ın meydanında sərgilədiyi oyunla göstərdi ki, iştahı böyükdü, çempionat marafonunda zirvəyə çatmaq naminə sona qədər döyüşəcək və minimum ilk "3-lük"də yerini tutacaq. Bu matçla Murad Musayev qalan komandalara mesaj göndərdi ki, ölkə çempionatında monoton iddialığa son qoyulur. Rusiyalı mütəxəssisin, "Qarabağ"a məğlub olmasına rəğmən, futbolçularına xüsusi qayğı ilə yanaşması, yetirmələrinin də matçsonrası azarkeşlərə minnətdarlıq jestləri nümayiş etdirməsi onu göstərir ki, "Sabah" yalnız klub deyil, həm də mehriban, pis-yaxşı gündə vəhdət təşkil edən ailədi.

"Bayquşlar"ın heyətində səviyyəli legionerlərin olmasına rəğmən, baş məşqçinin gənc Yusif İmanova, İldar Alekperova, Ceyhun Nuriyevə və başqa gənclərə güvənərək şans verməsi yalnız komandada yox, həm də ölkə çempionatında yerli futbolçular arasında rəqabəti gücləndirir. Bu halın baş verməsi isə millimizin inkişafına təkan deməkdi. Həmçinin üzərində çalışan gənc futbolçu "Sabah"ın gənclərə üstünlük verdiyini görüncə, daha da “artıraraq” Masazır təmsilçisində oynamaq, parlamaq eşqiylə çırpınacaq, nəinki "Neftçi", "Səbail" və "Zirə"də. Odu ki, Murad Musayev yalnız monotonluğu ilə “göz oxşayan” çempionatımıza rəng qatmır, həmçinin gənc futbolçuların üzə çıxmasına çalışır. Qısası, "Sabah" Murad Musayevlə muradına çata bilər...

ABDULLA İSMAYILOĞLU