Region Liqasının başlama vaxtı bəlli oldu
Region Liqası üzrə İşçi Qrupun üzvü, AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyev ötən saylarımızın birinə açıqlamasında sentyabrın sonunda liqa ilə bağlı ətraflı məlumat verəcəyini, turnirin start götürəcəyi tarixi açıqlayacağını bildirmişdi.
Sentyabrın son günü Region Liqası ilə bağlı məlumat əldə etmək üçün yenidən Yusif bəylə əlaqə saxladıq. Yeri gəlmişkən, Vəliyev həftəiçi bölgələrə səfər edərək liqada çıxış etmək istəyən bəzi klubların infrastrukturu ilə yerində tanış olub, uşaq futbolunun vəziyyəti ilə maraqlanıb.
Yusif bəy bu dəfə “Futbol+”ə bunları söylədi:
“Ötən dəfə sizə bildirdiyim kimi, Region Liqasında iştirak etmək istəyən komandaların müraciətinə baxılır. Bu il də iştirakçı sayının ötənilki civarda olacağı gözlənilir. Niyə dəqiq say demirəm? Çünki elə komandalar var ki, onlardan zəmanət məktubu gözləyirik. Bunu təqdim etməyən kollektivlər yarışa buraxılmayacaq. Növbəti həftənin ikinci gününə kimi vaxtları var. Həmin gün artıq bütün suallara nöqtə qoyulacaq. Bu dəfə də, demək olar, bütün zonalar üzrə yeni komandalar olacaq”.
Vəliyev bizimlə söhbətdə sayla bağlı dəqiq məlumat verməsə də, turnirin nə vaxt start götürəcəyini açıqladı:
“Gözlənilməz heç nə baş verməsə, oktyabrın 12-si və ya 13-də püşkatma olacaq. Oktyabrın 23-də isə Region Liqasında yeni mövsümə start verməyi düşünürük”.
RƏŞAD
Digər xəbərlər
