“Kəpəz”də qalmaqallar səngimək bilmir.

Tərlan Əhmədovun gəlişindən sonra vəziyyətin düzələcəyinə ümid edirdik. Amma... Gəlin etiraf edək ki, oyun baxımından irəliləyiş hiss olunur. Lakin təcrübəli mütəxəssisin futbolçularla münasibəti o qədər də yaxşı deyil. Tərlan bəy “Kəpəz”ə təyin olunandan sonra Rauf Əliyevlə problem yaşadı. Hücumçunu komandadan uzaqlaşdırdı. Hətta oyunlarının birindən sonra mətbuat konfransında bildirdi ki, Rauf Əliyev məsələsi onun üçün bağlanıb. Rəhbərliyə onun “Kəpəz”dən göndərilməsinin vacibliyini söylədiyini də dilə gətirdi. Lakin “sarı-göylər”in rəsmiləri Tərlan bəyi dinləmədi. Hətta Rauf Əliyev əvəzedici komandanın heyətində divizionda qollar da vurdu.

Bundan sonra düşünməyə başladıq ki, forvard əsas komandaya qayıdacaq. Amma Raufun mediaya açıqlaması hadisələri daha da alovlandırdı. O, baş məşqçi haqda aşağılayıcı fikirlər səsləndirdi. Tərlan Əhmədov da “Qarabağ”la görüşündən sonra keçirilən mətbuat konfransında bu məsələni rəhbərliyin həll etməli olduğunu dilə gətirdi.

Həqiqətən də “Kəpəz” başbilənləri bu problemi, türklər demiş, niyə çözmür? Elə bunu aydınlaşdırmaq üçün klubun Müşahidə Şurasının üzvü İlqar Nadiri ilə əlaqə saxladıq. Faktiki “Kəpəz”i idarə edən funksionerin “Football-plus.az”a qısa müsahibəsini təqdim edirik.

- İlqar müəllim, Zəfər və Bayraq Gününüz mübarək!

- Təşəkkür edirəm. Sizin vasitənizlə bütün Azərbaycan xalqını təbrik edirəm.

- Ölkə futbolunda gündəm olan bir məsələ var: Rauf Əliyev və Tərlan Əhmədov qalmaqalı. Baş məşqçi və futbolçu media vasitəsiylə bir-birinə söz atır. Hətta aşağılayıcı ifadələrə də yol verirlər. Tərlan müəllim deyir ki, “bu məsələni klub rəhbərliyi həll etməlidi, mən Rauf Əliyevi “Kəpəz”də görmək istəmirəm”. Nə üçün onun istəyi yerinə yetirilmir?

- Biz klub olaraq məsələnin bu müstəviyə gəlməsinə görə təəssüflənirik. Hər iki tərəflə danışıqlarımız olur. Düzdü, baş məşqçimiz Rauf Əliyevin komandadan göndərilməsini istəyir. Rauf da hörmət etdiyimiz futbolçulardandı. Ola bilər ki, Tərlan bəyin onu məşqdən qovmasına əsəbləşib. Çalışacağıq ki, tərəflər media vasitəsiylə bir-birinə söz atmasın. Bu məsələ həqiqətən də bizi narahat edir. Əlimizdən gələni edəcəyik ki, problem həll olunsun.

- Yəqin ki, Tərlan bəyin gəlişindən sonra komandanın oyun planında “artırdığını” qəbul edərsiz. “Kəpəz” artıq ilk turlardakı kimi hamıya məğlub olmur. Lakin baş məşqçinin istəyi yerinə yetirilmir. Bu da ictimaiyyətdə belə fikir formalaşdırır ki, klub rəhbərliyi Tərlan bəyin sözünü vecinə almır. Həqiqətən belədi?

- Necə yəni? Başa düşmədim.

- Veteran futbolçu Ramal Hüseynov dünən verilişlərin birində belə fikir səsləndirdi ki, “Kəpəz”də Rauf Əliyevin hörməti Tərlan Əhmədovdan çoxdu. Bu səbəbdən də hücumçu ilə yollar ayrılmır. Həqiqətən belədi?

- Əlbəttə ki, yox! Hər kəsin yanımızda hörməti var. Baş məşqçimizin seçiminə müdaxilə etmirik. Çalışırıq ki, onun üçün yaxşı şərait yaradaq. Rauf Əliyev də Azərbaycanın hörmət olunan futbolçularındandı. O, oyunu ilə sözünü deyib. Klub olaraq hər kəsə özünə görə hörmət edirik. Tərlan bəy bizim baş məşqçimizdi. Onun qərarlarına hörmət edirik. Səslənən fikirlər absurddu və heç bir əsası yoxdu.

- Belə başa düşdüm ki, problem hələ də həllini tapmayıb. Klubun Müşahidə Şurasının rəhbəri olaraq nə edəcəksiz? Bu problem barışıqla həll oluna bilər? Yoxsa Rauf Əliyev və ya Tərlan Əhmədov klubdan göndəriləcək? Qısaca, məsələnin tezliklə həll olunacağı ilə bağlı “Kəpəz” azarkeşlərinə söz verirsiz?

- Əlbəttə! Mən də çalışıram ki, məsələ barışıq yolu ilə həll olunsun. Tezliklə həm Rauf Əliyev, həm də Tərlan müəllimlə söhbət edəcəyik. Ümid edirəm ki, problem barışıq yolu ilə həll olunacaq.

İLKİN SULTANLI