Ötən həftə "Kəpəz"in baş məşqçisi Tərlan Əhmədov daha bir futbolçunun əvəzedici heyətə göndərdi.
Football-plus.az xəbər verir ki, bu, komandanın vitse-kapitanı Əli Səmədovdu. Təcrübəli mütəxəssisin qəzəbinə tuş gələn futbolçunu dinləyək:
"Açığı, əvəzedicilərə göndərildiyimi əvvəlcə bilmədim. Məsələdən agah olandan sonra Tərlan müəllimlə danışdım. Son oyunlardakı zəif çıxışıma görə bu qərarı verdiyini dedi. Mən də onun qərarına hörmət etdim, bir müddət "Kəpəz-2"də oynayacam. Ümid edirəm ki, tezliklə əsas komandaya qayıdacam".
Əli "Kəpəz"in çıxışından və komandadakı ab-havadan da söz açdı:
"Səmimi demək lazımdı ki, komandamız yaxşı təlim-məşq toplanışı keçə bilmədi. Heyət də tam komplektləşməyib. Buna baxmayaraq, Tərlan Əhmədovun gəlişindən sonra həm oyun planında, həm də nəticələrimizdə irəliləyiş var. Düzdü, "Sabah"la qarşılaşmada bərbad oynadıq. Amma "Neftçi"yə uduzsaq da, pis oynamadığımızı düşünürəm".
Vitse-kapitan "Kəpəz-2"də Rauf Əliyevlə birgə oynamasına və kimin orda kapitan sarğısını daşıyacağına da aydınlıq gətirdi:
"Əvəzedicilərdə Rauf Əliyevlə birlikdə oynayacağıma görə məmnunam. Rauf çox təcrübəli, istəkli futbolçudu. Bu yaşında belə üzərində işləyir, komandaya fayda verir, son 2 oyunda 3 qol vurub. Yəni millimizin sabiq hücumçusu hələ də oynamaq gücündə olduğunu göstərir. "Kəpəz-2"də Raufun, yoxsa mənim kapitan sarğısını daşıyacağımıza gəlincə, buna Xaliq müəllim qərar verəcək. 7 ildən çoxdu "Kəpəz"dəyəm, bu müddət ərzində də komandanı meydanı kapitan kimi çıxarmışam. Bəlkə də Raufun yerinə başqa futbolçuya kapitan sarğısı verib, məni kənarda saxlasaydılar, buna etirazımı bildirərdim. Amma söhbət millimizin sabiq üzvündən gedirsə, onun təcrübəsi, bacarığı əvəzedicilərdə kapitan olmasına haqq verir və buna qətiyyən etiraz etmərəm".
ABDULLA İSMAYILOĞLU