Rauf Əliyev Tərlan Əhmədovu aşağıladı - QALMAQAL
“Kəpəz”in baş məşqçisi Tərlan Əhmədovla komandanın hücumçusu Rauf Əliyevin münasibətlərinin pozulduğundan xəbəriniz var.
Mütəxəssis Gəncə klubunun “sükanı arxasına” keçəndən sonra yığmanın sabiq forvardını əvəzedicilərə yollamağı lazım bildi və mətbuata açıqlamasında onun əsas komandaya dönmək ehtimalının olmadığını bildirməklə yadda qaldı.
Bugünlərdə “msport.az” saytına açıqlama verən Əliyev baş məşqçinin qərarına münasibət bildirib:
“Heç bir baş məşqçi ilə intizamla bağlı problemim olmayıb. Milli və klub səviyyəsində yaxşı çıxışım çox olub. Mənim problemim intizamla bağlı deyil. Tərlanın qarnının ağrısı nə idisə, gələn kimi ilk məşqdən sonra məni əsas komandadan uzaqlaşdırdı. Halbuki təcrübəli futbolçuyam. Məşq zamanı hansısa gənc oyunçuya irad bildirə bilərəm. Adi bir şey idi. Stadionda olan hamı gördü. Məşqi izləyənlər də dedi ki, buna görə futbolçunu qovmaq gülüncdü. Əslində qovmayıb, məşqdən kənarlaşdırıb. O kimdi ki, məni qovsun? Böyük ehtimalla dərdi başqadı. Belə bir addım atıbsa, ən azı səbəbini açıqlamalıdı ki, ictimaiyyət də bilsin. Mətbuat konfranslarında bunu nizam-intizama görə etdiyini deməklə bilmirəm, bəlkə də özünü quruya çıxarır və ya xal qazanır. Hamı bilir ki, boş-boş şeylərdi. Baş məqşçidi, ola bilər ki, mənimlə işləmək istəmir. Bunu açıq şəkildə deməlidi. Kimin kimlə problemi varsa, əvvəldən deyir, o da işini bilir. Məşqdən öncə çağırardı, deyərdi ki, mən səninlə işləmək istəmirəm. Mən də normal qəbul edərdim. 33 yaşım var. Əsas komandaya əvəzedicilərdən 17-18 yaşlı uşaqlar cəlb olunur. Onların yanında mənə “nakidka”nı qoy, meydandan çıx” deməsi xoş deyil. Çünki orda heç vaxt intizamla bağlı problemim olmayıb. Fikrin var idisə, əvvəldən deyərdin. Tərlanın rəhbərliyi altında oynamaq istəmirəm”.
Göründüyü kimi, Rauf baş məşqçi barədə çox sərt danışıb. Hətta yumşaq desək, qırmızı xətti də keçib. Görəsən, klub rəhbərliyi bu barədə nə düşünür? Bir futbolçunun komandanın çalışdırıcısı barədə mətbuatda belə danışması, vulqar ifadələrdən istifadə etməsi, heç şübhəsiz, kollektivdaxili ab-havaya da təsir edir. Bu həm də Tərlan bəyin oyunçular arasında nüfuzunu aşağılamaq, onu düşərgədə gözdən salmaq deməkdi. Forvardın “Tərlanın qarnının ağrısı nə idisə...”, “o kimdi ki, məni qovsun? Böyük ehtimalla, dərdi başqadı” ifadələri gələcəkdə başqalarını da belə açıqlamalar verməyə ruhlandıra bilər. Belədə isə “Kəpəz”in düşərgəsində anarxiya baş qaldıracaq, Əhmədovun gəlişindən sonra dirçələn komanda yenidən quyunun dibinə yuvarlanacaq.
Məsələ ilə bağlı “sarı-göylər”in mətbuat katibi Azad Mustafayevlə əlaqə saxladıq. Azad bəy sözügedən açıqlamaya nə özünün, nə də klubun Müşahidə Şurasının sədrinin münasibət bildirməsinin düzgün olmadığını söylədi. Onu da əlavə etdi ki, müsahibənin linkini baş məşqçiyə göndərib. O fikir bildirmək istəsə, bu barədə qəzetə açıqlama verəcək. Deyəsən, “Kəpəz” rəsmiləri vəziyyəti düzgün dəyərləndirə bilmir və ya istəmir… Bəlkə də özləri bilərəkdən düşərgədə belə anormal mühitin formalaşmasında maraqlıdılar. Nə bilmək olar?
RƏŞAD
