“Kəpəz”in heyətində yer alan təcrübəli futbolçulardan Rauf Əliyev əsas komandadan qovulub.

Buna onun məşq zamanı komanda yoldaşları və məşqçilərə qarşı idmançıya yaraşmayan hərəkətlər etməsi səbəb olub. Tərlan Əhmədov isə Raufu öncə məşqdən, daha sonra komandadan uzaqlaşdırıb. Bu yerdə qeyd edək ki, hücumçu “Səbail”lə matçdan sonra AFFA İntizam Komitəsi tərəfindən 5 oyunluq cəzalandırılıb.
Maraqlıdı, futbolçu əvəzedici komandanın məşqlərinə qoşulubmu? “Kəpəz-2”nin baş məşqçisi Xaliq Mərdanov Rauf Əliyevə güvənəcək? Bu haqda məlumat almaq üçün mütəxəssislə əlaqə saxladıq:

“Niyə güvənməyək ki?! Rauf tanınmış, təcrübəli futbolçudu. Əlbəttə, güvənəcəyik. Məşqimiz bu gün başlayacaq. Yəqin ki, o da bizə qoşulacaq. Qəbələdə oynayandan sonra bərpa məşqi edib komandanı buraxdıq. Ondan sonrakı ilk məşqçimiz isə sabah baş tutacaq. Rəhbərlik, əsas komandanın baş məşqçisi necə məsləhət görsə, elə olacaq. Raufun əvəzedici komandanın heyətində çıxış edib-etməyəcəyini gələcək göstərəcək”.

ŞAİR ABDULLA