Tərlan Əhmədov “Kəpəz”in “sükanı arxasına” keçəndən sonra ilk işi təcrübəli Rauf Əliyevi əsas komandadan kənarlaşdırmaq oldu.

Komanda yoldaşına irad bildirdiyinə görə baş məşqçinin qəzəbinə tuş gələn hücumçu hazırda “sarı-göylər”in əvəzedici komandasında çıxış edir. Düşünmək olardı ki, bir müddət keçəcək, Əhmədovun qəzəbi soyuyacaq və Raufu yenidən əsas komandaya qayıdacaq. Ancaq premyer-liqanın 7-ci turu çərçivəsində baş tutan “Şamaxı” ilə matçdan sonra media nümayəndələrinin suallarını cavablandıran 50 yaşlı mütəxəssis açıq mətnlə bildirdi ki, işlədiyi dönəmdə Raufa “Kəpəz”in əsas komandasında yer yoxdu. Hətta rəhbərlikdən futbolçu ilə ortaq məxərəcə gəlib klubdan göndərilməsini istədiyini vurğuladı.

Hələ ki, bu yöndə yenilik yoxdu. Əliyev əsas komandada olmasa da, “ikincilər”də meydana çıxır, Xaliq Mərdanovun çalışdırdığı komandanın məşqlərinə qatılır. Bu gedişlə Rauf ən azı qış fasiləsinə qədər birinci divizionda çıxışını davam etdirməli olacaq. Komanda tapmayacağı halda isə ümumiyyətlə mövsümün sonuna kimi Gəncə təmsilçisinin “ikinciləri”nin şərəfini qoruyacaq. Belədə isə Əliyev aşağı dəstənin ən ödənişli futbolçusu sayıla bilər. Kluba yaxın mənbədən “Football-plus.az” saytına daxil olan bilgiyə əsasən forvardın aylıq məvacibi 5500 manat təşkil edir.

RƏŞAD