Bu mövsüm ''Mançester Yunayted''də işləri qaydasında getməyən Kriştiano Ronaldo son hərəkəti ilə yenə diqqət mərkəzinə düşüb.

Bazar günü ''Old Trafford''da ''Vest Hem''lə qarşılaşmadan öncə Ronaldo komanda yoldaşları kimi isinmə hərəkətləri etmək üçün meydana çıxdı. Meydana ayaq basmamış o, canlı yayında veriliş aparan ''Skay Sports''un əməkdaşları ilə görüşdü. Portuqaliyalı superulduz ekspert qismində verilişdə iştirak edən sabiq komanda yoldaşı Luis Saha və İngiltərə yığmasının sabiq üzvü Ceymi Rednapp ilə görüşsə də, onların yanında dayanan Qari Nevill ilə salamlaşmadı. Ronaldo özünü görməzliyə vuraraq sabiq komanda yoldaşının əlini sıxmadan meydana tərəf qaçdı. Bu, Kriştianonun son dönəmlərdə ikinci belə hərəkətidi. Bir müddət öncə o, ''Old Trafford''da daha bir qarşılaşmadan əvvəl eyni verilişin aparıcıları ilə salamlaşarkən onu tənqid edən ''Liverpul'' və İngiltərə yığmasının sabiq müdafiəçisi Ceymi Karrager ilə də görüşməmişdi. Amma həmin vaxt o, Nevill ilə salamlaşmışdı. Belə çıxır ki, Ronaldo onu tənqid edənləri bir-bir ''qara siyahı''ya salır. Çünki ''Yunayted''in sabiq kapitanı olan Nevill ''Tottenhem''lə oyun başa çatmamış stadionu tərk edən Ronaldonu bu addımına görə qınamışdı. Nevill ''Yunayted''in artıq bu oyunçuya ehtiyacının olmadığını və onun ayrılmasının hər iki tərəf üçün faydalı olacağını demişdi. Karrager son hadisənin ardından Nevillə ''Ronaldo tərəfindən iqnor edilənlər klubuna xoş gəlmisən'' yazaraq məsələyə ironiya ilə yanaşdı. Nevill özü isə bunları dedi:

Məsələyə ''Yunayted''in daha bir sabiq üzvü Rio Ferdinand da münasibət bildirdi:

Bu arada Ronaldo ilə Nevill arasında yaşanan olayın ardından sosial şəbəkələrdə 18 il əvvələ aid olan maraqlı bir video populyarlıq qazanıb. Bilindiyi kimi, Kriştiano ''Yunayted''ə 2003-cü ildə 18 yaşında ''Sportinq''dən gəlmişdi. Həmin vaxt Nevill artıq komandada nüfuzlu oyunçulardan biri sayılırdı. Video isə 2004-cü ilin aprelində ''Lester'' ilə oyundan sonra çəkilib. ''Yunayted''in 1:0 hesabıyla qalib gəldiyi qarşılaşmada qələbə qolunu Nevill vursa da, matçın ən yaxşısı Ronaldo seçilmişdi. Qari oyundan sonra açıqlama verərkən Ronaldonun matçın ən yaxşısı seçildiyini öyrənən kimi onu öz yanına, müsahibə verməyə çağırır. Bu, ingilis dilində yaxşı danışa bilmədiyi üçün çox utanan və narahat görünən Ronaldonun İngiltərədə ilk oyunsonrası müsahibəsi idi. Nevill yarızarafat, yarıciddi ona kömək etməyə çalışırdı. Oyundan razı qaldığını və qalib gəldikləri üçün sevincli olduğunu deyən Kriştiano növbəti sualı anlamaqda çətinlik çəkdi. Belə ki, o, ingilis dilində ''özünəinam'' mənasını verən sözün tərcüməsini başa düşmədi. Sonda Nevill Ronaldonu ilk müsahibəsi ilə təbrik edərək ona şampan butulkası hədiyyə etdi. Bu ikilinin 18 ildən sonra münasibətlərinin bu qədər dəyişməsi üzücüdü.