“Frayburq” Bakıda bu məkanı seçdi
“Qarabağ” cümə axşamı vacib qarşılaşmaya çıxacaq.
Avropa Liqasının qrup mərhələsinin sonuncu turunda rəqib “Frayburq” olacaq. Görəsən, almanlar nə vaxt Bakıya gələcək və harda məskunlaşacaq? Bu sualları klubun mətbuat xidmətinin rəhbəri Gündüz Abbaszadəyə ünvanladıq: “Frayburq” görüşə bu gün axşam saatlarında gələcək. Saat 19.30-da Bakıya çatacaqlar. “Abşeron Marriot” otelində məskunlaşacaqlar”.
Gündüz bəy Almaniyadan azarkeşlərin gəlib-gəlməyəcəyinə də aydınlıq gətirdi: “Rəqib fanatlar görüşdə iştirak edəcək. Onlar üçün sektor ayrılacaq. 500-ə yaxın “Frayburq” azarkeşinin matçı tribunadan izləməsi gözlənilir”.
Mətbuat katibindən “Qarabağ”ın Fransada hansısa çətinliklə üzləşib-üzləşmədiyini də soruşduq: “Bəlkə də qəribə gələcək. Amma bunu deməliyəm. Ən rahat olduğumuz səfər idi. Heç bir çətinliklə qarşılaşmadıq. Sadəcə, yerli fanatlar azarkeşlərimiz olan sektora tərəf gəlmək istədilər. Kiçik bir şey yaşandı. Sonra da dərhal sakitləşdilər. Amma ümumilikdə ən rahat səfərimiz idi”.
İLKİN SULTANLI
