“Beşiktaş” camiəsinin bir nömrəli gündəm mövzusu Valerien İsmaeldi.

Bu mütəxəssislə fanatların ulduzu heç cür barışmır. Elə son turda baş tutan “Trabzonspor”la qarşılaşmanın (2:2) sonlarına yaxın fanatların İsmaeli istefaya səsləməsi və Sərgən Yalçının xeyrinə təzahüratlar səsləndirməsi diqqətdən qaçmadı. 47 yaşlı mütəxəssis oyunsonrası mətbuat konfransında bu təzahüratlarla bağlı suala “türk dilində başa düşmürəm” cavabını verməklə kifayətlənmişdi. Şərhçilər bu sözünə görə onu biveclikdə günahlandırmışdı. Əslində İstanbuı nəhənginin nəticələri heç də bərbad deyil. Ona görə də İsmaelin camiədə bu dərəcədə sevilməməsi qəribə görünür. Komanda 10 turdan sonra 19 xal toplayıb və hazırda liderdən cəmi 2 xal geridədi. “Beşiktaş” prinsipial rəqiblərin heç birinə uduzmayıb və ən çox qol vuran 3-cü komandadı.

Müqayisə üçün bildirək ki, “ağ-qaralar” Sərgən Yalçınla sonuncu dəfə çempion olduqları 2020/21-də də ilk 10 oyuna məhz elə 19 xal toplamışdılar. Türkiyəli həmkarlarımız artıq İsmaelin təzminatını da ortaya çıxarıblar. Onların iddiasına görə, mütəxəssis qovulacağı təqdirdə 600 min avro təzminat alacaq.