İsmael futbolçuları, Veqhorst İsmaeli günahlandırdı
''Beşiktaş''ın Türkiyə çempionatındakı durumu günü-gündən qəlizləşir.
İstanbul nəhəngi dünən 11-ci tur çərçivəsində aşkar favorit sayıldığı qarşılaşmada səfərdə iddiasız ''Hatayspor''a uduzmaqla fanatlarına şok yaşatdı. ''Qartal''ın son 6 turda cəmi 1 qələbəsi var və komanda bu müddətdə 18 mümkün xaldan yalnız 6-nı toplayıb. Komanda daxilində də ab-hava yaxşı deyil. Bunu oyunsonrası açıqlamalardan da hiss etmək olar. Məsələn, böyük təzyiq altında olan və hər an qovulmaq ehtimalı olan baş məşqçi Valerien İsmael uğursuzluqda futbolçuları günahlandırıb:
''Şok edici bir məğlubiyyətdi. Durumu analiz edəcəyik. Oyunçular ''Beşiktaş'' kimi böyük bir klubun formasını daşıdıqlarını anlamalıdılar. Hər kəs üzərindəki məsuliyyəti dərk etməlidi. Bu performansı qəbul etmək mümkün deyil. Kənardan elə təəssürat yaranır ki, heç də bütün futbolçular var gücləri ilə oynamır. Mən məşqçi kimi üzərimə düşəni etməyə çalışıramsa, futbolçular da etməlidi''.
Digər tərəfdən komandanın əsas qol silahı Vut Veqhorst isə üstüörtülü şəkildə baş məşqçinin oyun sistemini qınayıb. Maraqlıdı ki, onun sözləri tərcüməçi tərəfindən düzgün tərcümə olunmayıb. Əslində isə forvard bunları deyib:
''Artıq ilk hissədə oyundan düşdük. İkinci hissədə bu, daha da çox hiss olunmağa başladı. Rəqiblər bizim necə hücumlar quracağımızı bilir. Onları təəccübləndirə bilmirik. Çünki tempimiz aşağıdı və oyunumuzda yaradıcılıq çatışmır. İkinci hissədə mənə elə gəldi ki, meydan həmişəkindən 100 metr daha böyükdü''.
Digər xəbərlər
