Dünən Türkiyə çempionatının 7-ci turunda ''Beşiktaş'' debütant ''İstanbulspor''un qonağı oldu. ''Qartal'' 2 dəfə hesabda öndə olsa da, yekunda 1 xalla kifayətləndi (2:2).

Ərsin Destanoğlunu son 2 turda ehtiyatda saxladığına görə tənqid atəşinə tutulan Valerien İsmael bu dəfə fikrindən dönərək istedadlı qapıçıya güvəndi. Amma Ərsin çox şanssız bir oyun keçirdi. O, əvvəlcə avtoqol müəllifi oldusa, son anlarda cərimə zərbəsindən daha bir top buraxdı. Start heyətində cəmi 2 əcnəbi oyunçu olan və mövsümün ən zəif büdcələrindən birinə sahib olan ''İstanbulspor'' sərgilədiyi xarakterlə böyük alqış qazandı. Komanda həm də bu mövsüm ilk dəfə bir oyuna 2 qol vurdu. ''Beşiktaş''la bağlı maraqlı məqam ondan ibarətdi ki, superliqada bu komandanın qapısına vurulan və ''çərçivə''yə düşən son 6 zərbənin hamısı, son 15 zərbənin isə 10-u qolla nəticələnib! İstanbul nəhənginin 7 tura 14 xal topladığını bildirək.