''Beşiktaş'' Cenk Tosunun ardından, nəhayət, əsas transferini rəsmən açıqladı.

Football-plus.az xəbər verir ki, İstanbul nəhəngi niderlandlı forvard Vut Veqhorstu heyətinə qatdı. 29 yaşlı futbolçu ''Bernli''dən birilliyə icarəyə götürülüb. Veqhorsta ''Bernli''də qazandığı məbləğ, yəni illik 2,8 milyon avro məvacib ödəniləcək. Bu üzdən ''Qartal'' ingilislərə icarə haqqı ödəməyəcək. Bundan başqa, müqavilədə maksimum 200 min avroluq performans bonusu da nəzərdə tutulub. Veqhorst ''ağ-qaralar''da ''10'' nömrəli formanı geyəcək. Təcrübəli futbolçunun sözlərinə görə, ''Beşiktaş''ı seçməsində fanatların böyük rolu olub. Azarkeşlər ona durmadan mesajlar göndəriblər və hətta Niderlanddakı evinin önünə klubun formasını və şərfini də qoyublar. Veqhorst həm bunları nəzərə aldığını, həm Türkiyədə oynamış həmyerliləri ilə məsləhətləşdiyini, həm də qəlbinin səsini dinləyərək ''Beşiktaş''ı seçdiyini bildirib. Qısaca qeyd edək ki, ''Bernli''dən savayı ''Volfsburq'', ''Herakl'', “Emmen” və ''Alkmaar''ın şərəfini qorumuş Veqhorst peşəkar karyerasında 396 rəsmi oyuna 163 qol vurub. Niderland yığmasında isə 14 oyuna 3 dəfə fərqlənib. Ən son Millətlər Liqasında Uelsə qarşı səfər oyununda qələbə qolunu məhz bu futbolçu vurmuşdu.

Türkiyə mətbuatının yazdığına inansaq, ''Beşiktaş'' Cekson Mulekanı da transfer edib. Bu transferin qarşılığında ''Standard''a 3,5 milyon avro və sonrakı satışdan 15 faiz pay veriləcək. 22 yaşlı konqolu forvardla beşillik anlaşma əldə olunub. Onun illik məvacibi 1,1 milyon avro olacaq. Muleka ötən mövsümün ikinci dövrəsinə damğa vurmuş və icarə əsasında şərəfini qoruduğu ''Kasımpaşa''da 14 oyuna 12 qol, 4 məhsuldar ötürməlik mükəmməl performans sərgiləmişdi.

Onu da bildirək ki, ''Beşiktaş'' srağagün toplanış üçün Avstriyanın Zaltsburq şəhərinə yollanıb. Valerien İsmaelin komandası Bad Harinq qəsəbəsində iyulun 16-na qədər toplanış keçəcək. Yeni transferlərdən Cenklə Fernandeş də komanda ilə birlikdədi. Saiss, Gezzal və N'Kudu bu gün, Veqhorst isə daha sonra düşərgəyə qoşulacaq. Bu arada ''Ayntraxt''a transferi düyünə düşən istedadlı sol müdafiəçi Rıdvan Yılmazın da komanda ilə birlikdə toplanışa yollanması diqqəti çəkib. ''Beşiktaş''ın frankfurtlulardan nəğd şəkildə 4 milyon avro tələb etməsindən sonra qarşı tərəf klub rəsmiləri ilə əlaqələri kəsərək danışıqları dayandırıb. Böyük ehtimalla artıq bu keçid baş tutmayacaq. Amma ''Torino''nun Rıdvana marağı davam edir. İtalyanlar 4 milyon avronu nəğd ödəməyə hazırdı.

ƏLİ