''Beşiktaş'' yeni mövsümə hazırlığı ötən şənbə günü doğma ''Vodafon Park''da İtaliya təmsilçisi ''Sampdoriya''ya qarşı keçirdiyi oyunla başa vurdu.

Bu, ''Sampdoriya''nın indiyə qədər Türkiyədə keçirdiyi ilk oyun kimi tarixə düşdü. Baş məşqçi Valerien İsmaelin bu dəfə 4 müdafiəçili sistemə üstünlük verməsi diqqəti çəkdi. Halbuki fransalı mütəxəssis həm ötən mövsümün 2-ci dövrəsində, həm də bu yay əvvəlki hazırlıq oyunlarında 3 müdafiəçili sistemə üstünlük verirdi. Ümumiyyətlə, camiədə və fanatlar arasında bu mütəxəssisə inam elə də böyük deyil. Fanatların bir çoxu baş məşqçi postuna Şenol Günəşin gətirilməsinin tərəfdarıdı. Oyuna gəlincə, qalib müəyyənləşmədi və görüş 1:1-lik bərabərliklə yekunlaşdı. Hesabı 37-ci dəqiqədə Əbdelhəmid Sabiri açdı. Mərakeşəsilli almaniyalı yarımmüdafiəçi mərkəz xəttinə yaxın bir yerdən mükəmməl aşırma zərbə ilə topu tora göndərdi. 65-ci dəqiqədə isə Veqhorst yekun nəticəni müəyyənləşdirərək ''Beşiktaş''ın heyətində ilk qolunu vurdu. ''Qartal'' bu hazırlıq dönəmində keçirdiyi 6 qarşılaşmadan 2 qələbə, 2 heç-heçə, 2 məğlubiyyətlə ayrılmış oldu. Komanda superliqada ilk oyununu avqustun 6-da doğma meydanda ''Kayserispor''a qarşı keçirəcək.

Yeri gəlmişkən, ''Reyncers''ə transfer olunan Rıdvan Yılmazın ardından ''Beşiktaş'' daha bir yetirməsini - Əmirhan İlkhanı itirmək üzrədi. Ötən mövsüm şans qazandığı oyunlarda diqqəti çəkməyi bacaran 18 yaşlı yarımmüdafiəçi ''Torino''ya keçməyin biraddımlığındadı. Həm futbolçu özü, həm də klub rəsmiləri italiyalılarla danışıqların davam etdiyini təsdiqləyiblər. Əslində ''Beşiktaş'' bu istedadlı oyunçu ilə iyunun ortalarında üçillik yeni müqavilə imzalamışdı. Amma məlum olub ki, həmin müqavilədə 4,5 milyon avroluq sərbəst qalmaq maddəsi var və ''Torino'' da bu məbləği ödəməyə hazırdı. Qeyri-adi nəsə baş verməsə, İlkhan yeni mövsümə Turində başlayacaq. Türkiyə mətbuatının yazdığına inansaq, ''Torino'' bu futbolçu ilə beşillik müqavilə imzalayacaq. Əmirhanın illik məvacibi isə 600 min avro təşkil edəcək.

ƏLİ