Türkiyə çempionatında gərgin mübarizə davam edir.

Artıq 10 tur arxada qalıb və liderlə 7-ci pillə arasında cəmi 4 xallıq fərqin olması diqqət çəkir. Mövsümün geridə qalan hissəsinin ən qəribə olaylarından biri ad baxımından bəlkə də tarixinin ən güclü hücum xətlərindən birinə sahib olan ''Qalatasaray''ın məhsuldarlığının hədsiz dərəcədə aşağı olmasıdı. Komanda 9 oyuna cəmi 10 qol vurub. Müqayisə üçün əzəli rəqib ''Fənərbaxça''nın eyni sayda oyuna az qala 3 dəfə çox – 28 qol vurduğunu bildirək. Turnir cədvəlinin ilk 13 pilləsinə nəzər salsaq, görərik ki, ''Qalatasaray''dan az qol vuran cəmi bir komanda (''Kasımpaşa'' – 9) var. Mauro İkardi, Dris Mertens və Haris Seferoviç kimi ulduzların aktivində rəsmi matçlarda nə qol var, nə də məhsuldar ötürmə. Yalnız ötən mövsümdən komandada qalan 37 yaşlı fransalı forvard Bafetimbi Qomis 4 qol vurub. Halbuki Qomis mövsümə komandanın 4-cü hücumçusu statusunda başlamışdı!

Bu arada ''Qalatasaray''ın yayda yollarını ayırdıqları forvardların performansına da diqqət yetirmək maraqlı olar. 2019-un yanvarında 13 milyon avroya alınmasına rəğmən bu yay havayı əldən verilən Mbaye Dianye ''Fatih Karagümrük''də 9 oyunda 5 qol, 1 məhsuldar ötürməlik performans sərgiləyib. ''Nant''a icarəyə verilən Mustafa Məhəməd isə ilk vaxtlar Fransa futboluna uyğunlaşmaqda çətinlik çəksə də, qısa müddətdə komandasının əsas qol silahını çevrilib. Misirli forvardın aktivində 16 rəsmi oyunda 4 qol, 2 məhsuldar ötürmə var. Yəni hələ ki, ''Qalatasaray''dan ayrılanlar yeni gələnlərdən daha yaxşı performans sərgiləyir.