“Kəpəz”in əvəzediciləri məcburiyyətdən əsas meydanda oynayıb
Gəncə stadionunda tribunaların qəzalı olması səbəbindən “Kəpəz”in ev oyunlarını Qəbələdə keçirdiyindən xəbəriniz var.
Ötən saylarımızın birinə müsahibə verən “sarı-göylər”in İdarə Heyətinin sədri İlqar Nadiri stadionla bağlı məsələyə toxunarkən, üç variant üzərində düşündüklərini, onlardan biri reallaşacağı halda komandanın ev oyunlarını Gəncədə keçirəcəyini söyləmişdi. Dünən isə “Kəpəz”in əvəzedici heyəti, azarkeşsiz olsa da, “Araz Naxçıvan”ı doğma şəhərdə qonaq etdi.
Olmaya “ikincilər”in oyunu test xarakteri daşıyır? Ortaya hansısa problem çıxmayacağı halda əsas komandanın da növbəti ev oyunlarını Gəncədə keçirməsinə icazə veriləcək? Bu suallara aydınlıq gətirmək üçün İlqar bəylə əlaqə saxladıq. Və məlum oldu ki, Xaliq Mərdanovun baş məşqçisi olduğu əvəzedici komanda məcburiyyətdən Naxçıvan təmsilçisi ilə görüşü əsas meydanda keçirib:
“Kəpəz-2”nin bu gün (dünən) ev oyununu Gəncə şəhər stadionunun əsas meydanında keçirməsinə səbəb ehtiyat meydanda aparılan təmir işlərinin tam başa çatmamasıdı. Qərara alındı ki, bir oyun azarkeşsiz həmin meydanda təşkil olunsun. Əvəzedici komanda növbəti ev görüşlərinə ehtiyat meydanda çıxacaq. O ki qaldı əsas komandanın məsələsinə, hələ ki bu mövzuda yenilik yoxdu. Qərar çıxan ilk gündən çalışırıq ki, komanda rəqiblərini kənarda yox, öz meydanında qəbul etsin”.
İlqar bəylə söhbətdə əsas komandadan kənarlaşdırılan Rauf Əliyevin məsələsinə də aydınlıq gətirməyə çalışdıq. Xatırladaq ki, Tərlan Əhmədov baş məşqçi kimi çıxdığı ilk məşqdə təcrübəli futbolçunu qovmuşdu. Bundan başqa, “Səbail”lə matçda qırmızı vərəqə aldığına görə 5 oyunluq cəzalanan Əliyevin əvəzedici heyətə göndərildiyi bildirilsə də, forvard Xaliq Mərdanovun çalışdırdığı komandanın məşqlərinə qoşulmayıb. “Raufun taleyi necə olacaq? O nə əsas, nə də “ikincilər”in məşqində iştirak edir” sualına İdarə Heyətinin sədri cavab verməyi lazım bilmədi.
RƏŞAD
Digər xəbərlər
