Türkiyə çempionatında gənc oyunçulara şans verilməsi baxımından aparılan son araşdırma ortaya maraqlı rəqəmlər çıxarıb.

Football-plus.az xəbər verir ki, superliqada gənclərə, demək olar, güvənmirlər. Burda söhbət 21 yaşına qədər olan, daha doğrusu, 2001-ci il yanvarın 1-dən sonra doğulan futbolçulardan gedir.

Cari mövsümün geridə qalan 7 turunda superliqada ümumilikdə 433 futbolçu meydana çıxıb. Onlar arasında yaşı 21-i ötməyənlərin sayı cəmi 33-dü! Bu 33 oyunçu ümumilikdə 3033 dəqiqə forma geymək şansı qazanıb. Bu zaman kəsiyi ümumi vaxtın yaınız 2,43 faizini təşkil edir! Bu mövsümdəki qaydalara görə superliqada mübarizə aparan 19 komanda hər matçın iştirak ərizəsinə ən azı 2 gənc oyunçunun adını daxil etmək məcburiyyətindədi. Hətta bu məcburiyyətə baxmayaraq, 5 klub gənc oyunçulara 1 dəqiqə də olsun şans verməyib. Söhbət “İstanbul BŞ”, “Konyaspor”, “Sivasspor”, “Adana Dəmirspor” və “Ankaragücü”ndən gedir. Yerdə qalan 14 klubda isə 7-si əcnəbi olmaqla 33 gənc futbolçu oyunlarda qısa müddət forma geyib. Bu baxımdan gənclərə ən çox çox güvənən klub “Beşiktaş”dı. “Qartal”da 21 yaşa qədər olan oyunçular ümumilikdə 911 dəqiqə meydanda olub. Amma bunun böyük hissəsi (630 dəqiqəsi) iki qapıçının – Ərsin Destanoğlu ilə Əmrə Bilginin payına düşür. Digər pillələrdə “Girəsunspor” (521 dəqiqə) və “Alanyaspor” (471) qərarlaşıb.

Daha bir acınacaqlı fakt odu ki, elita təmsilçilərində öz yetirmələri olan və bu mövsüm peşəkar müqavilə imzalayaraq əsas komandaya dəvət olunan cəmi 4 futbolçu oynamaq şansı qazanıb! “Fatih Karagümrük”də 18 yaşlı oyunçulardan Əmir Tintiş 80 dəqiqə, Efecan Mızrakçı 9 dəqiqə, “Kasımpaşa”da 16 yaşlı Yasin Özcan 52 dəqiqə, “Kayserispor”da isə 17 yaşlı Baran Əli Gezek 16 dəqiqə meydanda olub. Bütün bunları nəzərə alanda Türkiyənin Avropada gənclərə ən az güvənən ölkə olması faktı təəccüb doğurmamalıdı. Məsələn, Türkiyə çempionatını UEFA-nın əmsallar cədvəlində ilk “10-luq”da qərarlaşan ölkələrin çempionatları ilə müqayisə etdikdə bunu açıq-aydın görə bilərik. Bu liqaların hər birində forma geyən gənclərin sayı və ümumilikdə onların meydanda olduğu zaman Türkiyə ilə müqayisədə üstündü. Bu baxımdan lider Belçika (120 gənc oyunçu), Niderland (116) və Avstriya (86) çempionatlarıdı.