Bu yay önəmli transferlər həyata keçirən ''Fənərbaxça'' özünə lazım olmayan oyunçularla yollarını ayırmaqda davam edir.

"Football-plus.az" xəbər verir ki, ötən həftə Mbvana Samattanı ''Genk''ə icarəyə verən İstanbul nəhəngi son 3-4 gündə daha 3 oyunçu ilə vidalaşıb. Söhbət Marsel Tisseran, Muhammed Gümüşkaya və Maks Mayerden gedir. ''Fənər''ə 2020-ci ildə 4 milyon avroya ''Volfsburq''dan gələn Tisseran Səudiyyə Ərəbistanı təmsilçisi ''Əl-İttifaq''la üçillik müqavilə imzalayıb. Konqolu müdafiəçi ''Fənər''də 54 rəsmi oyunda 1 qol, 3 məhsuldar ötürmə ilə yadda qaldı. ''Sarı-lacivərdlilər''in öz yetirməsi olan 21 yaşlı Gümüşkaya isə Belçika təmsilçisi ''Vesterlo'' ilə dördillik müqavilə imzalayıb.

Ötən mövsümün ilk dövrəsində Vitor Pereyranın dönəmində şans qazanan yarımmüdafiəçi ikinci dövrəni icarə əsasında ''Girəsunspor''da keçirmişdi. İndiyə qədər Türkiyə çempionatında 26 oyuna çıxan Gümüşkaya bu oyunlarda 2 qol, 2 məhsuldar ötürməlik performans sərgiləyib. Almaniyalı Mayerin müqaviləsi isə qarşılıqlı razılıqla ləğv olunub. 26 yaşlı yarımmüdafiəçi ötən yay ''Köln''dən pulsuz transfer olunmuşdu. İlk dövrədə cəmi 12 oyuna çıxan və 1 qol vuraraq ümidləri doğrultmayan Mayer ikinci dövrəni icarə əsasında ''Midtyullan''da keçirmişdi. ''Fənərbaxça''nın bu yay oyunçu satışlarından əldə etdiyi gəlir diqqəti çəkməyə bilməz. Kim Min Çjeni ''Napoli''yə 18 milyon avroya, Allahyar Səyyadmaneş ilə Ozan Tufanı ''Hall Siti''yə ümumilikdə 7,5 milyon avroya, Tisseranı ''Əl-İttifaq''a 3 milyon avroya, Gümüşkayanı ''Vesterlo''ya 500 min avroya və Arda Kurtulanı ''Adana Dəmirspor''a 200 min avroya satan komanda bu yay satışdan 30 milyon avroya yaxın gəlir əldə edib! Onu da bildirək ki, son ayrılıqların ardından istanbullularda əcnəbi oyunçuların sayı 19-a enib.

''Fənərbaxça'' ilə bağlı bir xəbəri də diqqətinizə çatdıraq. Superliqada 3 turdan sonra 7 xal toplayan 4 komandadan biri olan və daha yaxşı top-fərqinə malik olduğu üçün zirvəni ələ keçirən komanda həftəsonu ''Konyaspor''la səfər oyununu Konyada yox, Əskişəhərdə keçirəcək. Bilindiyi kimi 5-ci İslam Həmrəyliyi Oyunlarının açılış mərasimi zamanı Konyanın ev oyunlarını keçirdiyi stadionun ot örtüyü bərbad vəziyyətə düşüb. Komanda federasiyaya müraciət edərək bu həftə ''Fənərbaxça'' ilə oyunun İstanbulda, yəni ''Fənər''in meydanında keçirilməsini istəmişdi. Amma Türkiyə Futbol Federasiyası görüşün Əskişəhərdə oynanılacağına qərar verib. ''Konyaspor'' artıq burda bir oyun keçirib. Komanda bundan əvvəlki ev matçında ''İstanbul BŞ''ni məhz Əskişəhərdə qəbul etmiş və görüş qolsuz başa çatmışdı. Qeyd edək ki, ''Konyaspor'' hələ ki, ''İstanbul BŞ'' ilə birlikdə bu mövsüm qol buraxmayan iki komandadan biridi.