Məlum olduğu kimi, ''Beşiktaş'' son turda öz meydanında ''İstanbul BŞ''yə minimal hesabla uduzmaqla həm mövsümdə ilk məğlubiyyətini aldı, həm də liderliyi təhvil verdi.

Baş məşqçi Valerien İsmaelin o matçdakı heyət seçimi ciddi müzakirələrə səbəb oldu. Fransalı mütəxəssis belə vacib oyunda müdafiənin mərkəzində yeni transfer Tayyip Talha Sanuçun əvəzinə Nəcip Uysala, qapıda isə Ərsin Destanoğlunun yerinə təcrübəsiz Əmrə Bilginə güvənmişdi. Buraxılan qol zamanı məhz Nəcip ötürmədə səhvə yol verdi. Əmrə Bilgin isə yaxın küncə yönələn topu dəf edə bilmədi. Çox güman, Nəcip gələn oyun ehtiyatda qalacaq və onun yerini Sanuç tutacaq. Qapıçı məsələsi isə hazırda camiədə bəlkə də bir nömrəli gündəm mövzusudu. Ərsin Destanoğlunun əsas qapıçı statusunda olması heç kimdə şübhə doğurmurdu. Amma İsmael birdən-birə qərarını dəyişərək son 2 turda Əmrə Bilginə şans verdi. Destanoğlunun əsas heyət üzünə həsrət qalmasının əsl səbəbi heç də onun performansı ilə bağlı deyilmiş. Məlum olub ki, 21 yaşlı qapıçı rəhbərliyin müqaviləni yeniləmək təklifini geri çevirdiyi üçün bir andaca gözdən düşüb! Türkiyə mətbuatının yazdığına inansaq, rəhbərlik bu istedadlı qapıçıya ''4+1'' illik müqavilə təklif edib. Sadəcə, Ərsin klubdan illik 25 milyon lirə (təxminən 1,37 milyon avro) maaş istəyib. Bu da rəhbərliyin xoşuna gəlməyib. Ona görə də rəhbərlik baş məşqçiyə bu qapıçını ehtiyatda saxlamaq təlimatı verib! İsmael ən son qapıçılarla bağlı suala cavab verərkən ''Əmrə Bilginin oynamasının xüsusi bir səbəbi yoxdu. Çox yaxşı iki gənc qapıçıya sahibik. İkisi də eyni səviyyədədi. Əmrə hazırlıq dönəmini çox yaxşı keçirdi. Rəqabəti artırmaq üçün ona da şans vermək qərarına gəldik'' açıqlamasını vermişdi. Amma aydın məsələdi ki, o, yalan danışır! Destanoğlu səviyyəcə Bilgindən üstündü. Sadəcə, onun müqavilə müddəti gələn yay bitir. Yəni yeni anlaşmaya imza atmayacağı təqdirdə Ərsin yanvardan etibarən istədiyi klubla danışıqlar aparmaq hüququna malik olacaq. Bu durumda onun oynamamasının yeganə səbəbi yeni müqavilə ilə bağlı anlaşmanın əldə olunmamasıdı. Yayda ''Beşiktaş'' bu qapıçıya görə ''Nitsa'' və ''Lion''dan təklif almışdı. Amma maliyyə şərtlərində anlaşmaq mümkün olmamışdı. Xatırladaq ki, 195 sm boya malik olan və Türkiyə yığmasına da müntəzəm dəvət edilən Ərsin ''Beşiktaş''ın öz yetirməsidi. O, indiyə qədər İstanbul nəhəngində 90 rəsmi qarşılaşmada meydana çıxıb. 30 oyunda qapısını toxunulmaz saxlayıb və ümumilikdə 107 qol buraxıb. Bu arada Türkiyə mətbuatının yazdığına görə, Əmrə Bilginin ümidləri doğrultmamasının ardından İsmael indi də diqqətini digər qapıçı Mərt Günoka yönəldib. Təcrübəli qapıçı ötən mövsüm ağır zədə alaraq uzun müddətə sıradan çıxsa da, artıq oynamağa hazırdı. Gələn tur onun ''11-lik''də peyda olması sürpriz olmayacaq. Ərsinin isə bundan sonrakı aqibətinin necə olacağı maraq doğurur.