“Kəpəz”i gəncəli mütəxəssis çalışdıracaq – RƏSMİ AÇIQLAMA
Misli premyer-liqasının 4-cü turunda baş tutan "Səbail" - "Kəpəz" matçında meydan sahibləri 4:1 hesabı ilə qələbə qazandı.
Bu matçdan sonra Gəncə təmsilçisinin baş məşqçisi Yaşar Vahabzadə istefa verdi. Hazırda "Kəpəz"i məşqlərə əvəzedici komandanın baş məşqçisi Xaliq Mərdanov çıxarır.
Görəsən, yeni baş məşqçi kim olacaq? "Football-plus.az" saytı olaraq bu suala aydınlıq gətirmək üçün klubun icraçı direktoru İlqar Nadiriylə danışdıq:
"Müvəqqəti olaraq baş məşqçi vəzifəsini Xaliq Mərdanov icra edir. İstəyirik ki, komandanın “sükanı arxasına” gəncəli məşqçi gətirək. Hazırda bir neçə yerli mütəxəssislə danışıqlar aparırıq. "Kəpəz"i 5-ci turda "Qarabağ"la matça Xaliq Mərdanov çıxaracaq. Yeni baş məşqçinin adına nə vaxt aydınlıq gələcəyini dəqiq deyə bilmərik. Amma çalışacağıq sentyabrda bu məsələyə nöqtə qoyulsun".
İlqar bəy Yunis Hüseynov, Aftandil Hacıyev, Sənan Qurbanov, Şahin Diniyev kimi məşqçilərin adının "Kəpəz"lə yanaşı hallanmasına da aydınlıq gətirdi:
"Bu mütəxəssislərin adının klubumuzla yanaşı hallanması normal haldı. Onların hər biri premyer-liqa təcrübəsi olan mütəxəssislərdi. Amma ortada rəsmi nəsə yoxdu".
ABDULLA İSMAYILOĞLU
Digər xəbərlər
