“Komandaya şəxsi münasibətim heç də yaxşı deyil” - Xaliq Mərdanov
İlk 4 turdakı məğlubiyyətlərdən sonra “Kəpəz”in baş məşqçisi Yaşar Vahabzadə, nəhayət ki, istefa verdi.
Yeni baş məşqçi seçiminə qədər isə komanda əvəzedici heyətin çalışdırıcısı Xaliq Mərdanova tapşırılıb. Mütəxəssisi qarşıda ciddi sınaq gözləyir. Belə ki, Gəncə təmsilçisi 5-ci tur çərçivəsində son çempion “Qarabağ”la qarşılaşacaq.
Maraqlıdı, ilk 4 turdakı məğlubiyyət, Yaşar Vahabzadənin komandadan gedişi “Kəpəz”in futbolçularına necə təsir edib? Onların hazırkı psixoloji durumu necədi? Bu haqda məlumat almaq üçün Xaliq Mərdanovla əlaqə saxladıq. Onun “Football-plus.az” saytına açıqlaması belə oldu:
“Hazırda komandanın durumu normaldı. Düzdü, ruh düşkünlüyü var, amma yenə də istəyirik ki, bunlar aradan qalxsın. Yaşar Vahabzadənin gedişinin futbolçulara təsir edib-etmədiyini deyə bilmərəm. Bu ruh düşkünlüyü ilk 4 turda qeydə alınan məğlubiyyətlərə görədi. Bəlkə də bəzilərində fərdi olaraq narhatlıq var. Mən bunu deyə bilmərəm. Futbolçulara media, azarkeşlər tərəfindən də təzyiqlər olur, ruh düşkünlüyünə əsas səbəb budu”.
Keçirilən 4 oyunun hamısında məğlub olmaq, əlbəttə ki, arzuolunmaz haldı. Xaliq Mərdanovun “Kəpəz”in ilk 4 turdakı çıxışına münasibətini də öyrəndik:
“Nə deyim? Bu məğlubiyyətlərdən sonra kimin münasibəti yaxşı olar? Komanda çempionata pis başladı. Gəncənin adına yaraşmayan məğlubiyyətlər oldu. Komandaya şəxsi münasibətim heç də yaxşı deyil. Hazırda “Qarabağ”la oyuna hazırlaşırıq. Rəqibimiz Avropada tanınmış klublardan biridi. Biz də ona uyğun hazırlıq, taktiki məşqlər edirik. Əlimizdən gələni maksimum dərəcədə etməyə çalışırıq ki, komanda bu vəziyyətdən çıxsın. Allahın köməyi ilə istəyirik ki, vəziyyət düzəlsin”.
ŞAİR ABDULLA
