"Qarabağ"ın milliləşdirilmiş xorvatiyalı futbolçusu Filip Ozobiç ölkəsinin mətbuatına müsahibə verib.

"Football-plus.az" xəbər verir ki, "Index"ə danışan yarımmüdafiəçi Çempionlar Liqasının qrup mərhələsinə düşə bilməmələrindən və Azərbaycan futbolundan söhbət açıb.

- Çempionlar Liqasının pley-off mərhələsinin “Viktoriya” ilə (1:2, ilk oyun - 0:0) cavab matçında komandanızın yeganə qolunu vurdunuz. Statistikaya görə, komandanız rəqibdən üstün idi, amma bu, nəticədə öz əksini tapmadı...

- Bəli, məncə, bu cütün ən yaxşı komandası Çempionlar Liqasından kənarda qaldı . Ancaq “Viktoriya”nın qrupa layiq olmadığını da deməzdim. Onları təbrik etmək lazımdır. Amma hər iki görüşdə biz daha yaxşı tərəf idik. Daha irəli gedə bilmədiyimiz üçün məyus olduq.

- Sizi qarşıda Avropa Liqası gözləyir. Komandanın vəzifəsi nədən ibarətdi?
- “Lex”, “Sürix” və “Ferensvaroş”u təsadüf nəticəsində keçməmişik. “Qarabağ” uzun illərdir ki, qruplarda çıxış edir. Ötən mövsüm Konfrans Liqasında pley-offa yüksəldik. İnanırıq ki, Avropa Liqasında bu hədəfə çata bilərik.

- “Qarabağ”ın oyunçuları o qədər də populyar deyil, lakin onlar kifayət qədər yüksək səviyyəli oyunçulardı. Komandanızın gücünü və Azərbaycan çempionatını necə dəyərləndirərdiniz?
- İnsanlar burada oynayan futbolçular haqqında çox şey bilmirlər. Yerlilər və legionerlər kifayət qədər keyfiyyətlidi. Nəticələrimiz təsadüfi deyil. Komanda uzun illərdi ki, avrokuboklarda çıxış edir. Çempionatın səviyyəsinə gəlincə, bu, təbii ki, Xorvatiyanın yüksək liqası deyil, ancaq burada da “Qarabağ”, “Neftçi”, “Sabah” kimi klublar oynayır. Həqiqətən yaxşı komandalar var.

- Ötən ildən Azərbaycan millisində çıxış edirsən. Bu, necə baş verdi?

- Gördüm ki, Xorvatiya millisinə düşmək şansım yoxdu. 5 il burada qaldıqdan sonra Azərbaycan millisinin təklifini qəbul etmək qərarına gəldim. Yığmada tək əcnəbi mən deyiləm, braziliyalı Riçard Almeyda da var.

- “Milliləşdirmə” federasiyasının strategiyasının bir hissəsidi?

- AFFA beş il bu ölkədə yaşayan legionerin millini gücləndirə biləcəyini düşünür və ona vətəndaşlıq təklif edilir. Düşünürəm ki, seçimim yerli azarkeşləri sevindirmişdi.

- Azərbaycandakı yaşayışınız necə gedir? Dili bilirsinizmi?

- Burada insanların çoxu rus dilində danışır. Ona görə də dil baryeri yoxdu. Bakıya gəlincə, bu, çoxlu yeni tikililəri olan müasir şəhərdi. Yaşamaq üçün çox xoş şəhərdi. Mümkünsə, hamıya bura gəlməyi məsləhət görürəm.