AFFA Hakimlər Komitəsinin sədri Barış Şimşək "CBC Sport"da yayınlanan "Bizim futbol" verilişinin qonağı olub.

Türkiyəli mütəxəssis VAR-ın tətbiqi və başqa məsələlər ilə bağlı maraqlı fikirlər səsləndirib.

* "Zirə" - "Sumqayıt" oyununda VAR sisteminə nəzarət edən Nicat İsmayıllı çox yaxşı iş gördü. Rəşad Sadıqova hörmət edirəm. Əslində özünün də dediyi kimi, hər şey necə olmalıydısa, elə də oldu. Hakimlərimiz qaydalara tam əməl edir, hər şeyi görür. Mövsüm ərəfəsində klublara təlim keçdik. Ola bilsin, fikirlərimizi onlara tam çatdıra bilməmişik. Yenidən təlim keçiriləcək. Bilirəm ki, baş məşqçilər yenə etiraz edəcək. Hakimlərimiz tam hazırdı. Lakin VAR-la bağlı təcrübəsizdilər. Növbəti il daha yaxşı şeylərdən danışacağıq.

* Belə şeylərə diqqət etmək lazımdı. Hakimlər qətiyyətli olmalıdı. Bu cür hallarda, laızm gələrsə, qırmızı vərəqə göstərməlidilər. Hakim epizoda baxarkən ona müdaxilə etmək olmaz.

* Qısa müddətdə qərar verilməlidi. Amma dediyim kimi, indiki halda bu normaldı. Ədalət istəyiriksə, bunun bədəli zamandı. Başqa yolu yoxdu. Bəlkə gələcəkdə bu vaxt itkisini, hətta hakimləri də aradan qaldıracaq yeni sistem yaradıldı. Razıyam, epizodun dəyərləndirilməsi uzun çəkdi. Bu təkcə "Zirə"nin baş məşqçisi ilə bağlı deyil. Hakimlər bir-birini başa salmaqda çətinlik çəkirdi.

* Biz epizodlara fərqli baxırıq. Fikrimcə, ilk 3 tur uğurlu keçdi. Düzdü, səhvlərimiz oldu, amma bunu normal qarşılayırıq. Hakimlərimiz bu işə yeni başlayıb. Yeganə təcrübəli referimiz Əliyar Ağayevdi. Onu da 5 yerə bölüb, matçlara göndərə bilmərik (gülür). Bu mövsüm hakimlərdən çox VAR-dan danışılacaq. Çalışmalıyıq ki, müsbət danışsınlar. Hazırkı mənzərə pis deyil. VAR hakimlik yox, futbol üçün gətirilib. Hər şeyə müdaxilə etsə, vaxt çox gedər. Hamının xoşbəxt olmasına çalışacağıq. Çempionat gərginləşdikcə, işimiz də çətinləşəcək".