Misli premyer-liqasında 3-cü turun oyunları keçirilir.

Son oyun günündə "Kəpəz" "Qəbələ"ni qəbul edib. Görüş qonaqların 3:0 hesablı qələbəsi ilə başa çatıb. Matçdan sonra meydan sahiblərinin baş məşqçisi Yaşar Vahabzadənin mətbuat konfransı keçirilib. Mütəxəssis oyunla bağlı fikirlərini bölüşüb və jurnalistlərin suallarını cavablandırıb:

- Dediniz ki, futbolçular tapşırıqları yerinə yetirə bilmədi. Ola bilər ki, Premyer Liqa səviyyəsində komanda formalaşdırmaq üçün büdcə yetərli deyil?
- Bunu büdcəyə bağlamazdım. Sadəcə olaraq, futbolçular Premyer Liqada oynayırlarsa, bu cür səhvlər etməməlidilər. Əlimizdə olan, istifadə edə biləcəyimiz futbolçular da bunlardı. Büdcəmiz yaxşı olsaydı, daha səviyyəli, keyfiyyətli futbolçular gətirə bilərdik.

- Üç oyunun hamısında məğlub oldunuz. Nə qədər davam gətirə biləcəksiz?
- Ardıcıl üç turda çətin rəqiblərlə qarşılaşdıq. Hər üç komanda da avrokuboklarda çıxış edirdi. İstər-istəməz rəqiblərimizin hazırlıqları daha yaxşıdı, heyətindəki futbolçular daha keyfiyyətlidi. Biz isə yeni formalaşmış komandayıq. Futbolçular ilk dəfədir ki, birlikdə oynayır. Bəlkə də vaxt lazımdı. Dözmək məsələsinə gəlincə, vallah, bilmirəm bu suala necə cavab verim.

- Bayaq dediniz ki, vaxta ehtiyac var. Bəs, həmin vaxt rəhbərlik tərəfindən sizə veriləcək?
- Bu, rəhbərlikdən asılıdı. Düzdü, uduzduq. Amma müdafiədə dayanmamışdıq, futbol oynayırdıq, futbolçularım hücum da edirdi. Qol epizodları da yaratdıq, sadəcə istifadə edə bilmədik. Legionerlər var ki, onlar da çempionatımıza öyrəşməlidi. Yerlilərin özü də komandaya uyğunlaşmalıdı. Hazırda bu yöndə prosses gedir.

- “Kəpəz” rəqiblərindən nədə geri qalır?
- Üç oyunu uduzsaq da, müəyyən komandalar var ki, oyun keyfiyyətinə görə onlarla bərabər səviyyədəyik.