Misli premyer-liqasında 2-ci tura yekun vurulub.

“Neftçi” “Kəpəz”i qəbul edib. Görüş meydan sahiblərinin 5:2 hesablı qələbəsi ilə başa çatıb. Oyundan sonra Gəncə təmsilçisinin baş məşqçisi Yaşar Vahabzadənin mətbuat konfransı keçirilib. O, görüş barədə fikirlərini bildirib:

"Bizim üçün ağır oyun olacağını gözləyirdik. Qolları buraxmayana qədər komanda pis görünmürdü. Amma səhvlər etdik və qollar buraxdıq. Həmin qollardan sonra toparlanmaq çətin idi. Müəyyən dəyişiklik etdik, istədik ki, dönüş yaradaq. Hücumda nəsə alındı, müdafiədə səhvlər var idi. Ona görə bugünkü oyunda uduzduq”.

- “Kəpəz” “Neftçi”yə qarşı nə oyunu oynayırdı?
- Oyunumuzu müdafiədən qurmuşduq. Əks-hücumda nəsə etmək istəyirdik. Bilirdik ki, “Neftçi” topla yaxşı rəftar edir. Onlarla açıq futbol oynamaq çətin olacaqdı.

- Azarkeşlər sizi istefaya səsləyirdi. Bu barədə fikriniz necədi?
- Bəli, onların istefa qışqırdığını eşidirdim. Əlbəttə ki, qulaqlarım yaxşı eşidir. Buna münasibətim normaldı.

- Komandada psixoloji gərginlik var idi, yoxsa təzyiqə dözə bilmədiz?
- Buraxılan qollar psixoloji gərginlik yaratdı. Standart vəziyyətdən qol buraxdıq. Uşaqlara toparlanmalı olduqlarını nə qədər desək də, alınmadı.

- Şuaybunu start heyətində meydana buraxmaq olmazdı?
- “Zirə” ilə matçda bugünkü start heyətilə oynamışdıq. Hesab edirdik ki, normal oynamışıq və ona görə dəyişiklik etmək istəmədik.