Konfrans Liqasının 3-cü təsnifat mərhələsinin cavab oyunları keçirilib.

"Neftçi" səfərdə "Rapid"ə uduzub - 0:2. Matçdan sonra "ağ-qaralar"ın baş məşqçisi Laurentsiu Regekampfın mətbuat konfransı keçirilib. Mütəxəssis oyun barədə fikirlərini bölüşüb və jurnalistlərin suallarını cavablandırıb:

- Taktiki anlamda "Rapid"ə uduzmadız. Bəs qalib gəlməkdə nə çatmadı?
- Başımızı dik tutmalıyıq. Birlikdə qələbə qazanıb birlikdə uduzuruq. Bu, futboldu. Şanslardan yararlanmayanda məğlub olmağa məhkumsan. Bizim əlimizə düşən şanslar onlarda olmadı. Təkbətək epizodları qola çevirə bilmədik. Sadə qollar buraxdıq.

- Əvəzetmələri gec etməyiniz nədən qaynaqlanırdı?
- Bizim oyunu uzatmaq planımız yox idi. Bura vaxtı uzatmağa gəlməmişdik. Təbii ki, oyunçularımız var. Amma çoxunun təcrübəsi yoxdu. Ona görə də çalışdım ki, oyuna görə məsuliyyət daşıya biləcək futbolçuları meydanda saxlayım. Təəssüf ki, Azəri tez itirdik və məcburi əvəzetməyə getdik. Belə qollar buraxmalı deyildik. 100 faizlik qol şanslarından yararlana bilmirsənsə, deməli növbəti mərhələyə layiq deyilsən.

- Rəqibin 12-ci oyunçusu hakim idi. Buna şərhiniz maraqlıdı...
- Hakimlər haqda danışmaq mənim işim deyil. Heç bir problemim yoxdu. Hamı oyuna baxıb. Hər kəs hakimi analiz edə bilir. Bir çox epizodda rəqibə sarı vərəqə verməli idi, lakin vermədi. Oyunun ipini əlindən buraxmışdı. Amma hakim haqda danışmalı deyilik. Biz bu gün hakimə görə uduzmadıq.

İLKİN SULTANLI, Vyana