Sabah Konfrans Liqasının 2-ci təsnifat mərhələsində "Neftçi" "Ari's"lə qarşılaşacaq.

Football-plus.az xəbər verir ki, bu gün keçirilən mətbuat konfransında Laurentsiu Regekampf iştirak etdi.

Rumın mütəxəssis görüş haqda fikirlərini səsləndirib, daha sonra jurnalistlərin suallarını cavablandırdı:

- Sabahkı matçla bağlı qarşıya qoyulan məqsəd nədi: baxımlı oyun göstərmək, yoxsa mərhələ adlamaq?
- İlk oyundan əvvəl də bunu demişdim. Biz indi rəqibi daha yaxşı tanıyırıq. İlk görüşdə “Aris”in yüz faizlik şansı var idi, top qapı tirindən döndü. Həmçinin bizim də imkanlarımız oldu. Bir epizodda da penaltimiz verilmədi. İkinci məqam odu ki, rəqibin mərkəz müdafiəçisinin sarı vərəqəsi var idi. Bizim qapıçıya qarşı kobudluq etdiyi zaman ikinci sarı vərəqə ilə meydandan qovulmalı idi. “Aris”in aqressiv oynaması normal idi, evdə oynayırdı. Biz də sabah eyni şeyi etməyə çalışacağıq. Öz komandama güvənirəm. İnanıram ki, gözəl oyunla lazımi nəticə əldə edəcəyik. Bunu necə edəcəyimizi sabah meydanda görəcəksiniz.

- Birinci oyunda rəqibin göstərdiyi oyunun “Neftçi”nin üzərindəki təsiri necə idi? Həmçinin məşqçiyə olan təzyiqlər hansı formadadı?
- Düşünürəm ki, dediklərimin hamısı düzgün tərcümə olunur. Burda “Aris”in əleyhinə danışmaq və ya onlar haqda pis söz demək üçün gəlməmişəm. Yalnız öz fikirlərimi çatdırmağa çalışıram. Burdan “Neftçi” fanatlarına mesaj göndərmək istəyirəm ki, sabah döyüşəcəyik. Çalışacağıq döyüşkən komanda quraq. Mən öz oyunçularıma siqnal ötürməliyəm, onlar da meydanda buna əməl etməlidilər. İtiriləsi heç nəyimiz yoxdu. Birinci oyunun ilk 20 dəqiqəsində meydanda yatdıq, 2 qol buraxdıq. Səmimi desəm, 3-cü topu da buraxmalı idik. 3-cü qolu buraxsaydıq, köklənmək daha çətin olardı. Ona görə də bu, mənim üçün işarədi. Oyunçularıma düzgün göstəriş verməyə çalışıram. Həftə ərzində bütün səhvlərimizi izah etdim. Dönüş yaratmaq üçün əlimizdən gələni etməli və 90 dəqiqənin ardından nəticəyə baxmalıyıq. İndidən deyə bilmərəm ki, sabah 5 qol vuracağıq. Amma onu deyə bilərəm ki, mərhələ adlamaq üçün əlimizdən gələni edəcəyik.

- Start heyətini müəyyənləşdirmisiz? Hansısa mövqe ilə bağlı tərəddüdünüz var?
- Əlbəttə, müəyyənləşdirmişəm. Dəyişiklik olub-olmayacağını deyə bilmərəm. Sabah start heyətində kim olacağını da deyə bilmərəm. Amma əminəm ki, sabah oyunçularımız meydanda tam başqa cür çıxacaq. Dolu tribunaların təzyiqinin oyunçularımıza müsbət təsir edəcəyini düşünürəm. Sabah fanatlarımızla qələbəni qeyd edəcəyimizə inanıram.

- Demək olar ki, yay transfer pəncərəsinin ən fəal komandası oldunuz. Amma yeni gələnlər ilk görüşdə tam gözləniləni edə bilmədilər. Alınan futbolçuların neçə faizi sizi sisteminizə uyğund?
- Edilən bütün transferlər rəhbərlik, skaut departamenti, məşqçi korpusu olmaqla hamımız birlikdə etmişik. Vaxt azlığından daha çox variantlara baxa bilmədik. Düşünürəm ki, düzgün seçimlər etmişik. Bu transferlər də “Neftçi”yə xeyirli olacaq.