Bu mövsüm iddialı heyət quran və komandanın başına İqor Tudoru gətirən ''Marsel''də çaxnaşmalar bitmək bilmir.

"Football-plus.az" xəbər verir ki, Fransa mətbuatının son iddiasına görə komandanın kapitanı və lideri Dmitri Payet Tudorun futbolçularla ünsiyyət səviyyəsindən kəsgin narazı qaldığı üçün prezident Pablo Lonqoria ilə təkbətək görüş keçirmək niyyətindədi.

''Marsel''in oyunçuları narazılıqlarını xorvatiyalı mütəxəssisin özünə də bildiriblər. Bir neçə gün öncə Tudor məşqdə yarımmüdafiəçi Jersonla söz davasına çıxmışdı. Bundan başqa məşqçinin hücumçu Dienqlə də münasibətləri çox pisdi və onların bir-birini gözü götürmür. Bu qalmaqallar ortaya çıxdıqdan bu yana ''Marsel'' fanatları sosial şəbəkələrdə #TudorOut heşteqi açaraq mövsüm başlamadan məşqçinin qovulmasını tələb ediblər.

Bundan başqa ''Marsel''in hazırlıq matçlarında zəif təsir bağışlaması və 4 oyundan 3 məğlubiyyət, 1 heç-heçə ilə ayrılması da Tudora indidən inamın azalmasına səbəb olub. Bu arada Fransa mətbuatının iddiasına görə sərt xarakterinə görə komandada sevilməyən Tudor Cengiz Ündərə də əsas heyət üzvü gözü ilə baxmır. Hətta məşqçi türkiyəli ulduzun onun sisteminə uyğun gəlmədiyini deyərək futbolçunun satılmasının daha yaxşı olacağını rəhbərliyə bildirib. Halbuki Cengiz ötən mövsüm 46 rəsmi oyunda 13 qol, 6 məhsuldar ötürməlik performans ilə komandasının ən yaxşılarından biri olmuşdu. Xatırladaq ki, daha öncə Türkiyədə ''Karabükspor'' və ''Qalatasaray''ı çalışdırmış Tudor ötən mövsüm ''Verona'' ilə diqqətçəkən yüksəlişə nail olmuşdu. ''Marsel''in başına isə o iyulun əvvəllərində gətirilmişdi.