"Turan Tovuz" Gürcüstanda keçirdiyi təlim-məşq toplanışına yekun vurub. Komanda qonşu ölkədə 10 gün ərzində keçirdiyi 3 oyunun ikisində qalib gəlib, birində uduzub.
"Football-plus" az xəbər verir ki, tovuzluların baş məşqçisi Ayxan Abbasov toplanışı belə dəyərləndirib: "Bu təlim-məşq toplanışı bizim üçün vacib idi. Yeni formalaşan komandayıq. Çempionatın başlamasına az qalıb. Qısa müddət ərzində Gürcüstan yüksək liqa komandaları ilə oyunlarda futbolçuların bir-birinə uyğunlaşması, səhvlərimizi görmək baxımından çox vacib toplanış oldu. Yüksək tempdə hazırlaşdıq. Kiçik zədələrimiz də oldu, xüsusən Şakir Seyidovun zədələnməsi işlərimizə bir qədər mane oldu. Bütün heyət ideal formaya yaxınlaşmaq üçün istəklə çalışdı. Bütün futbolçuları sınaqdan keçirmək imkanımız oldu. Heyətdə olan gənc futbolçularımız da güclü rəqiblərə qarşı özlərini müsbət tərəfdən göstərə bildilər. Əlbəttə, belə toplanışlarda nəticə önəmli deyil. Çempionat oyunları hamı üçün çox çətin keçəcək. Oturuşmuş heyətə malik rəqiblərlə oynayacağıq. Lakin ümid edirəm ki, layiqincə mübarizə aparmağa gücümüz çatacaq. Bu gün Tbilisi toplanışını başa vurub vətənə qayıdırıq. İki gün istirahətdən sonra Tovuzda yenidən bir araya gəlib "Qəbələ" ilə oyunun hazırlığına başlayacağıq. Komanda 9 ildən sonra premyer-liqaya vəsiqə qazanıb. Qısa müddətdə bəzi problemlər oldu. Təlim-məşq toplanışının tez bir zamanda təşkil olunmasında klub rəhbərliyinə, şəxsən Tovuz Rayon İcra Hakimiyyətinin başçısı Məmməd Məmmədova təşəkkürümü bildirmək istəyirəm. Səbirsizliklə azarkeşlərimizin qarşısında keçirəcəyimiz ev oyunlarını gözləyirik. Hər kəsi səbirli olmağa, bizə güvənməyə və dəstəkləməyə çağırıram".