Fevralın 17-də həşiş yağının qaçaqmalçılığına dair ittihamla “Şeremetyevo” hava limanında həbs olunan ikiqat olimpiya çempionu Brittni Qraynerin məhkəməsi ilə bağlı vaxtaşırı məlumat veririk. O, Ximki Şəhər Məhkəməsində keçirilən prosesdə ilk dəfə ifadə verib. Amerikalı qadın basketbolçunun vəkili Mariya Blaqovolina ifadə ilə bağlı bunları deyib: “Brittni izah etdi ki, Rusiya qanunlarını bilir və onlara hörmət edir, qanunu pozmaq niyyəti olmayıb. Toplanış vaxtı kovidsonrası sindroma, sıx qrafikə və qarşıdakı uzun uçuşa görə stress içində və yorğun olub, əşyalarını tələsik toplayıb. Brittni təsdiq etdi ki, tibbi kannabisdən yararlanmaqla bağlı həkim diaqnozu var, bu isə ABŞ-da peşəkar idmançılar arasında yetərincə geniş sayılan müalicə növlərindən sayılır. Onun həşiş yağını Rusiyaya gətirmək və burda istifadə etmək planı olmayıb. Müştərim həmçinin onu da dedi ki, Yekaterinburq onun üçün ikinci evdi və Rusiyada yaşamağı çox bəyənir”.
Amerikalı basketbolçunun iki maddə üzrə ittiham olunduğunu, onu 3 ildən 10 ilə qədər həbs gözlədiyini dəfələrlə bildirmişik. Bu arada ABŞ prezidenti Co Baydenin administrasiyası Rusiya tərəfinə bu ölkənin vətəndaşı Viktor Butu amerikalılar Pol Uilan və Brittni Qrayner ilə dəyişməyə hazır olduğunu bildirib. Bununla bağlı CNN xəbər yayıb. Bu qaynağa inansaq, ABŞ silah alverçisindən dəyiş-düyüşdə yararlanmaq fikrinədi, Bayden özü şəxsən bu varianta razılıq verib. ABŞ dövlət katibi Entoni Blinken Rusiyada həbs olunan amerikalıların taleyini yaxın günlərdə bu ölkənin xarici işlər naziri Sergey Lavrovla müzakirə etmək fikrindədi. Qraynerin digər vəkili Aleksandr Boykov dəyiş-düyüş variantı ilə bağlı bunları deyib: “ABŞ-ın təklifini xəbərlər proqramından öyrəndik. Belə danışıqlarda vəkillər iştirak etmir. Hüquqi baxımdan yalnız məhkəmənin hökmü açıqlanandan sonra dəyiş-düyüş mümkündü. İstənilən halda, Brittni tezliklə evə buraxılarsa, biz buna şad olarıq. Məhz belə də olacağına ümid edirik”.
Xatırladaq ki, Viktor But 2008-ci ildə Taylandda həbs olunub və ardından ABŞ-a təhvil verilib. Amerikanın hakimiyyət orqanlarının terrorçu təşkilatlar sırasına aid etdiyi Kolumbiyanın inqilabi silahlı qüvvələri adlı təşkilata silah satışında suçlanan rusiyalı 25 illik həbs cəzası alıb. ABŞ-ın xüsusi xidmət orqanları onu dünyada qeyri-qanuni silah satışının ən böyük adamlarından biri sayır. But özü günahını boynuna almır. Pol Uilan isə 2020-nin iyununda cəsusluğa görə ittiham olunaraq 16 il iş alıb və hazırdı Rusiyada – ciddi rejimli islah-əmək müəssisəsində saxlanılır.