Aqil Abbas “Qarabağ”ın mərhələ adlamasına görə bu addımı atacaq - AÇIQLAMA
Dünən Çempionlar Liqasının 2-ci təsnifat mərhələsi çərçivəsində "Qarabağ" səfərdə "Sürix"lə ağır oyun keçirsə də, sonda mərhələni keçən tərəf oldu.
Daim komandanın yanında olan, dəstəyini əsigəməyən Aqil Abbasın oyunla bağlı fikrini öyrəndik. Millət vəkili “Football-plus.az” saytına bunları söylədi:"Demişdim ki, "Qarabağ" "Sürix"i də tapdalayıb keçəcək. Söylədiyim gerçəkləşdi. Dünən "Qarabağ" meydanda futbol sərgiləmədi, əsl "köhlən atlar" kimi meydan çapdı. İsveçrəlilərlə matçda Qurban Qurbanovun yetirmələri "Yaşma"nın xüsusi təyinatlıları kimi döyüşdü. "Sürix"lə oyunda bir daha hakimlərin bizə qarşı qərəzini gördük. Ağdam təmsilçisi Avropada bir az uğur qazanan kimi referilər ədalət qoruyan tərəf yox, rəqiblərin 12-ci oyunçusuna çevrilir. Avropalıların bizə qarşı ikili standartını, yuxarıdan aşağı baxmasını isveçrəli azarkeşlərin, rəqibin baş məşqçisinin yekəxanalığından bir daha gördük. Qurban Qurbanov və "Qarabağ"ın futbolçuları avrokuboklarda yalnız gözoxşayan oyunları ilə yox, həm də davranışları, “feyr-pley”ə tam əməl etmələri, təmkin və mədəniyyətləriylə diqqəti çəkib. Ötən il Qurban Qurbanovun "Marsel" ilə Bakıdakı oyunda göstərdiyi nümunə futbol dünyasında təqdirəlayiq hal kimi qiymətləndirilsə də, avropalılardan həmin əməlləri görmədik. Rəqibin baş məşçisinin “topu onlara qaytarmayın” deməsi də onların necə “feyr-pley” qaydalarını tapdalamasını göstərir.
Dünənki matçda referilikdən, ümumiyyətlə, danışmağa dəyməz. Meydanda hakim ədaləti yox, rəqibin dəyirmanına su tökməklə məşğul idi. Futbolçularımıza haqsız yerə sarı vərəqələr verdi, bizə qarşı qayda pozuntularını görməzdən gəldi. Heç nə olmadığı halda oyunun əsas vaxtına 7 dəqiqə əlavə etdi. Qısası, hakim dünən rəqibin qələbə qazanıb, mərhələ keçməsi üçün əlindən gələni etdi. Amma "Qarabağ" layiqli oyunu, əsas da Ovusunun öldürücü zərbəsiylə onların arzusunu gözündə qoydu.
Avropalılar bizə hələ də 3-cü dünya ölkəsi kimi baxırlar. Baxmayaraq ki, çox şeydə biz onlardan əsrlərboyu üstün olmuşuq. Rəqibin ikinci qolu vurması və "Sürix"in prezidentinin sevinci, coşqusu diqqətimdən yayınmadı. O, düşünürdü ki, komandası əlavə vaxtda bizi darmadağın edib, boynubükük Bakıya yola salacaq. Amma özü miskin vəziyyətə düşdü. İlk oyunda itin xəstələnməsinə görə Bakıya gələ bilməyən klub prezidenti bundan sonra deyəsən, birdəfəlik Bakıya gələ bilməyəcək. Çünki biz onlara meydanda döyüşərək qalib gəlməyimizlə yaxşı futbol dərsi keçdik. "Sürix"in prezidentinin və isveçrəli azarkeşlərin bizə yuxarıdan aşağı baxması rəhmətlik Vaqif Səmədoğlunun 2000-ci illərdə Starsburqda avropalıları heyran etməsini yadıma saldı. Deməli, mən və Vaqif daxil bir qrup ziyalımız Starsburqda səfərdəydik. Bir çox konfraslarda, yığıncaqlarda olduq. Onda da bizə qarşı ikili standartı, qərəzi, riyakarlığı görürdük. Bizi son dərəcə geridə qalmış xalq kimi qiymətləndirirdilər. Yığıncaqların birində fasilə idi, bu zaman gözünə döndüyüm Vaqif bir piano tapdı. Dərhal onun arxasında əyləşərək, avropalı bəstəkarlarların musiqilərini ifa etməyə başladı. Şairimiz o qədər məharətlə ifa edirdi ki, bütün avropalı siyasətçilər, ombudsmanlar, ziyalılar, yazıçılar heyranlıqla ona tamaşa edirdilər. Vaqif Səmədoğlu pianodakı ifası ilə ağzıaçıq qalmış avropalılara göstərdi ki, biz heç də düşündüyünüz kimi geridəqalmış xalq deyilik. 44 günlük müharibədə də oğullarımız düşmənə, onların havadarlarına və bütün dünyaya nələrə qadir olduğumuzu göstərdi. İndi həmin uğuru Qurban Qurbanovun rəhbərlik etdiyi "Qarabağ" davam etdirir. Dünən oyundan sonra Qurban müəllimə zəng edərək, onu və bütün futbolçuları təbrik edib, bağrıma basdığımı söylədim. Sağ-salamat vətənə qayıtsınlar, onların şərəfinə qurban da kəsəcəm.
Növbəti mərhələdə Macarıstan təmsilçisini də üstələyəcimizə inanıram. Fürsətdən istifadə edərək "Qarabağ" azarkeşlərinə bir daha müraciət edirəm ki, bu gün Konfrans Liqasında cavab oyunlarını keçirən "Qəbələ" və "Neftçi"ni də tək buraxmasınlar. Hər bir klubumuzun avrokuboklardakı uğuru Azərbaycan futbolunun irəli getməsi və parlamasıdı”.
ABDULLA İSMAYILOĞLU
Digər xəbərlər
